Tá lucht ceannais an Aontais Eorpaigh ag ceiliúradh chliseadh Viktor Orbán i dtoghchán na hUngáire agus is ag cur fáilte ó chroí roimh an bpríomh-aire nua, Péter Magyar.
Ba é Orbán an duine is mó a raibh gráin ag an lucht ceannais air sa Bhruiséil mar chuir sé arís is arís i gcoinne iarrachtaí an Choimisiúin Eorpaigh airgead an Aontais Eorpaigh a úsáid le cabhrú leis an Úcráin, ag éileamh go n-éireodh an tAontas as a gcuid iarrachtaí fad a chur leis an gcogadh.
Sheas Orbán le cairdiúlacht leis an Rúis, agus chosain sé ceart na hUngáire breosla a cheannach ón Rúis. B’fhadhb don lucht ceannais é.
Ach in ainneoin na fáilte atá feartha roimh Magyar ní léir go bhfuil aon difear idir an bheirt i dtaobh na bpolasaithe sin.
Mar shampla, i bParlaimint na hEorpa, vótáil Magyar agus a fheisirí Eorpacha i gcoinne rialachán an Aontais Eorpaigh ar mheicníocht um chomhar iasachta don Úcráin in 2024, lenar bunaíodh creat airgeadais an Aontais Eorpaigh do chúnamh na hÚcráine. Cosúil le Orbán, tá Magyar freisin i gcoinne chomhaontú imirce an AE, agus na gcuótaí éigeantacha.
Chomh maith leis sin, cé go ndeir Magyar go bhfuil sé ag iarraidh dea-chaidreamh a chothú arís leis an gCoimisiún Eorpach, tá sé chomh naimhdeach don ghluaiseacht aerach is a bhí Orbán, agus ar aon phort leis maidir leis an inimirce.
Dá mbeadh Péter Magyar tar éis buachan ar shóisialaí nó ar Chríostaí Daonlathach, déarfadh ceannlínte na nuachta gur thit an Ungáir le pobalach eile, mar tá Magyar, cosúil le Orbán, suite ar an taobh deas de réimse an phobalachais.
Ó thaobh na polaitíochta de, is as an bpáirtí céanna é, agus phós sé fiú duine de na daoine ba dhíograisí a lúbann i dtreo Orbán. Tháinig deireadh leis an gcaidreamh sin in 2023. Bhunaigh Magyar a pháirtí feiceálach deasach féin, Tisza, agus d’fhear sé feachtas frithchaimiléireachta. Orbán gan an chaimiléireacht, a deirtear.
Tá airgead dlite don Ungáir reoite ag an gCoimisiún Eorpach mar gheall ar líomhaintí faoi chaimiléireacht agus cur isteach ar riail an dlí. Is cuma an líomhaintí dáiríre iad nó leithscéal le pionós a chur ar Orbán mar gheall ar a chur i gcoinne an Choimisiúin Eorpaigh maidir leis an Úcráin, ach beidh Magyar ag iarraidh an t-airgead sin a fháil anois gan aon athrú polasaí maidir leis an Úcráin nó leis an inimirce.
B’in go deimhin an téama bolscaireacht a bhí aige le linn an fheachtais toghchánaíochta.
An raibh an lucht ceannais róghasta ag ceiliúradh? Feicfimid.