Grianghraf: Matthew Burke
Bhí lá den scoth ag Féile Peile Ban Bhaile Átha Cliath 2026 i lárionad CLG Bhaile an Aba, áit ar ghlac 109 foireann ó 63 club páirt i gceiliúradh ollmhór ar pheil na mban ag leibhéal na hóige. Léirigh an líon rannpháirtithe agus an caighdeán imeartha sna ranna go léir go bhfuil an cluiche ag dul ó neart go neart ar fud an chontae.
Sa chluiche ceannais i roinn 9 ba iad na Gaeil Óga a sheas amach, agus bhain siad an chraobh amach le bua 3-04 i gcoinne 3-00 ar Naomh Pádraig, Baile Phámar. Ba í Caitlin Ní Chonaill laoch na himeartha, agus í ar lasadh ar fad, ag scóráil trí chúl iontacha chun an bua a chinntiú dá foireann.
Níor thosaigh an cluiche go maith do na Gaeil Óga, áfach, mar bhí Naomh Pádraig chun tosaigh go luath le dhá chúl ó Ruby Mae Hayes sna chéad ocht nóiméad. Ach léirigh na Gaeil Óga misneach agus diongbháilteacht, agus tháinig siad ar ais go láidir roimh leath ama. Bhí 1-01 tapa ag Ní Chonaill ríthábhachtach, rud a d’fhág na foirne ar comhscór ag an sos.
Sa dara leath, bhí an cluiche thar a bheith cothrom, ach ba é críochnú géar Ní Chonaill a rinne an difear. Chuir sí dhá chúl eile leis an scór, lena n-áirítear an tríú ceann a tháinig tar éis botún sa chosaint, agus thug sin buntáiste cinntitheach dá foireann. Cé gur throid Naomh Pádraig go cróga go dtí an fheadóg dheireanach, ní raibh siad ábalta teacht suas leis na seaimpíní nua.
Bhí taispeántais láidre eile ó Alanagh Ní Lorcáin, Laragh Ní Lorcáin agus Lily Ní Bhroin do na Gaeil Óga, agus sheas Ruby Mae Hayes, Éabha Howard agus Nia Green amach do Naomh Pádraig.
I rith an lae imríodh cluichí ceannais in 14 roinn éagsúla, rud a léirigh fairsinge agus fuinneamh na féile. Ó roinn 1 go roinn 14 bhí buaiteoirí éagsúla ann, lena n-áirítear Cluain Tarbh, na Fianna agus Binn Éadair, rud a léiríonn scaipeadh láidir tallainne ar fud Bhaile Átha Cliath.
Ba lá cuimhneacháin é freisin, agus tugadh ciúnas nóiméid i gcuimhne ar Mháire Uí Chonchúir, iar-rúnaí de chuid Chumann Pheil na mBan Bhaile Átha Cliath. Ar an iomlán, d’fhág Féile 2026 oidhreacht láidir, agus todhchaí gheal le sonrú don spórt.
Na Gaeil Óga: Freya Bollard, Amy Boyd, Hannah de Brún, Lara Mag Eochagáin, Niamh Ní Mhaoláin, Clodagh Ní Bhriain, Ciara Ní Dhonaill, Ruby Nic Shearraigh, Caitlín Ní Chonaill, Réiltín Ní Chonaill, Réiltín Ní Dhubhda, Laragh Ní Lorcáin, Grace Ní Mhurchú, Saorla Ní Mhurnáin, Saoirse Ní Shíoda, Lily NiBhroin, Aoife Oman, Rosalie Pollard, Proinsias Nic an Ghearr, Eibhlín Ní Tuathaigh.
Bainisteoirí: Freda De Brún, Ciarán Oman, Annamarie Ní Fhairceallaigh, Daithí Ó Murchú.