Cóilín Duffy
Tá scáth an teannais idirnáisiúnta ag titim ar ullmhúcháin Chorn Domhanda FIFA 2026 de réir mar atá amhras ag dul i méid faoi rannpháirtíocht na hIaráine sa chomórtas, a bheidh ar an gceann is mó i stair an tsacair. Cé go bhfuil oifigigh FIFA ag maíomh go leanfaidh an comórtas ar aghaidh mar a bhí beartaithe, d’fhéadfadh an choimhlint leanúnach sa Mheánoirthear tionchar suntasach a imirt ar chomhdhéanamh an chomórtais.
Ag labhairt dó ag an Ionad Craolacháin Idirnáisiúnta in Dallas Dé Luain, dúirt Príomhoifigeach Oibriúcháin FIFA, Heimo Schirgi, go bhfuil an comórtas “ró-mhór” le cur ar ceal nó le cur siar, in ainneoin na géarchéime idirnáisiúnta atá ag dul i méid. Dar leis, tá FIFA ag leanúint de bheith ag déanamh monatóireachta ar an scéal go dlúth.
“Ag pointe éigin beidh réiteach ann agus rachaidh Corn an Domhain ar aghaidh mar a bhí beartaithe,” a dúirt Schirgi. “Tá an comórtas ró-mhór, agus tá súil againn go mbeidh gach tír a cháiligh in ann páirt a ghlacadh ann.”
Tá an Iaráin ar cheann de na tíortha sin a cháiligh don chomórtas trí Chónaidhm Shacair na hÁise. Tá siad le himirt i nGrúpa G i gcoinne na Beilge, na Nua-Shéalainne agus na hÉigipte. Tá dhá cheann de na cluichí sin le bheith ar siúl in Los Angeles, agus ceann eile in Seattle.