Drochscéal eile do Mhicheál Martin is ea an phobalbhreith is deireanaí an tseachtain seo ó Ireland Thinks a foilsíodh in The Sunday Independent an Domhnach seo caite.
Dar leis an bpobalbhreith seo, ceapann 45% de na vótóirí gur chóir do Martin éirí as láithreach mar thaoiseach agus mar cheannaire ar Fhianna Fáil. Níl ach 13% ag rá gur cóir dó fanacht mar cheannaire don olltoghchán seo chugainn.
Ní thabharfaidh Martin aon aird ar an mbreith seo, gan dabht, ach tabharfaidh baill an pháirtí, na teachtaí Dála agus na seanadóirí.
Go dtí seo bhí tuairim taobh istigh den pháirtí go rabhthas ag breathnú ar Martin le gnaoi agus gur mheall sé vótaí don pháirtí mar gheall air sin. Léiríonn na figiúirí seo, cibé gnaoi atá ann i leith an Taoisigh, go bhfuiltear fós den tuairim go bhfuil a rás rite.