Tá súil ag Naomh Abán le caibidil eile a scríobh ina scéal rathúil i bpeil na mban Dé Domhnaigh seo, agus iad ag tabhairt faoi Chluain Mhic Cuinn/Maigh Mheáin ó Chiarraí i gcluiche ceannais idirmheánach Chúige Mumhan i bPáirc Mhala, ag tosú ag 1 tráthnóna.
Tá taithí acu ar an láthair agus an ócáid. Bhí Naomh Abán i Mala roimhe in 2022 nuair a thug siad leo craobh shóisear Chúige Mumhan tar éis bua dhá chúilín ar Úlla ó Luimneach. Ach mar a mhíníonn an captaen, Colleen Phelan, is dúshlán nua ar fad é seo don fhoireann.
“Tá cúpla aghaidh nua againn ó bhua dhá bhliain ó shin,” a dúirt sí le An Páipéar. “Tá taithí mhór sa ghrúpa, ach is céim suas í seo anois. Bhíomar ag tógáil i rith na bliana don chluiche seo, agus tá sceitimíní ar gach duine dul i mbun catha arís Dé Domhnaigh.”