Breis is leathbhliain ó thit rialtas Bashar al-Assad as a chéile ag deireadh 2024 agus teacht i gcumhacht d’antoiscigh Ioslamacha Shunnaíocha sa tSiria faoi cheannas Ahmed al-Sharaa, a bhfuil an t-ainm cogaidh Abu Mohammed al-Jolani air, tá géarleanúint á déanamh acu ar gach pobal faoina gceannas nach mbaineann lena greideamh Ioslamach Sunnaíoch nó lena dtuairimí polaitiúla antoisceacha creidmheacha. Hayat Tahrir al-Sham an t-ainm atá ar an eagraíocht atá faoi cheannas Ahmed al-Sharaa. Bhí aithne air mar Fronta al-Nusra roimhe seo. Táthar den tuairim gur craobh de Al-Qaeda dáiríre é Hayat Tahrir al-Sham. Tá an chuid is mó de chríoch na Siria faoi smacht acu anois, seachas na cúigí sa tuaisceart agus san oirthear ina bhfuil na Coirdínigh i gceannas.
Tháinig Hayat Tahrir al-Sham i gcumhacht tar éis blianta fada d’idirghabháil idirnáisiúnta le linn Chogadh Cathartha na Siria a thosaigh sa bhliain 2011 nuair a thacaigh na Stáit Aontaithe, an Ríocht Aontaithe, an Fhrainc, monarcachtaí Arabacha na Murascaile, Iosrael agus an Tuirc go príomha le fórsaí éagsúla a chuir i gcoinne rialtas Baathach Assad trí airm, airgead, oiliúint, tacaíocht pholaitiúl agus mhíleata a chur chucu. Fuair Hayat Tahrir al-Sham tacaíocht ar leith ó na Turcaigh faoi dheireadh i mí na Nollag 2024. Ní raibh rialtas Assad in ann an brú a sheasamh agus thit sé as a chéile. Leis sin bhí an t-aon chosaint ag na mionlaigh imithe.