Tá tionscnamh náisiúnta nua seolta i bPáirc an Chrócaigh a bhfuil sé mar aidhm aige tacú le daoine atá ag maireachtáil le néaltrú trí úsáid a bhaint as guth aitheanta an tráchtaire CLG, Mícheál Ó Muircheartaigh, chun cuimhní, mothúcháin agus nasc pobail a mhúscailt arís. Tugtar The Replay ar an tionscadal, cartlann fuaime ar líne a thugann le chéile tráchtaireacht stairiúil ar chluichí ceannais na hÉireann idir 1985 agus 2010.
Forbraíodh an tionscnamh i gcomhar idir Cumann Alzheimer na hÉireann, Cumann Luthchleas Gael agus Cartlann RTÉ, le tacaíocht iomlán ó theaghlach Uí Mhuircheartaigh. Tá sé bunaithe ar phrionsabal na teiripe cuimhneacháin, modh a léiríonn taighde go bhféadfadh sé giúmar agus folláine mhothúchánach daoine a bhfuil néaltrú orthu a fheabhsú.
Ar an ardán nua ar líne, atá ar fáil ag www.TheReplay.ie, is féidir cluichí a chuardach go héasca de réir bliana, cluiche nó contae. Mar sin, beidh sé indéanta do theaghlaigh agus do chúramóirí filleadh ar chuimhneacháin a mhúnlaigh glúnta de lucht leanúna CLG, agus ar ghuth a thug beocht do chluichí móra an tsamhraidh ar feadh blianta fada.
Dúirt Príomhfheidhmeannach Cumann Alzheimer na hÉireann, Andy Heffernan, go bhfuil cumhacht ar leith i nguth Uí Mhuircheartaigh. “Do go leor daoine atá ag maireachtáil le néaltrú, is féidir le fuaim a ghutha cuimhní láidre a oscailt, cluichí a breathnaíodh leis an teaghlach, Domhnaigh shamhraidh agus an spleodar a roinneadh le chéile.”
Labhair Uachtarán CLG, Jarlath Burns, faoin tábhacht chultúrtha a bhaineann leis an tionscnamh. Dar leis, bhí guth Uí Mhuircheartaigh ina shiombail den phobal agus den fhéiniúlacht a bhaineann le CLG, agus go gcuideoidh The Replay na cuimhní sin a choinneáil beo.
Dúirt mac le Mícheál, Éamonn Ó Muircheartaigh, gur mór an onóir don teaghlach é a ghuth a chloisteáil arís ag cuidiú le daoine eile. “Chreid Daid i gcónaí i gcumhacht an spóirt daoine a thabhairt le chéile,” a dúirt sé.
Tá breis agus 64,000 duine ag maireachtáil le néaltrú in Éirinn faoi láthair, agus léiríonn taighde go bhféadfadh cuimhní comhroinnte, go háirithe iad siúd a bhaineann le spórt agus cultúr, cabhrú nasc agus le folláine a chothú.
Le The Replay, tá guth a chuir stad ar náisiún tráth anois ag tabhairt sóláis, cuimhní agus áthais ar ais do ghlúnta eile.