Bhí slua ollmhór i láthair san Ionad Comhdhála i lár chathair Bhaile Átha Cliath Déardaoin nuair a reáchtáladh FÍS 2026, comhdháil nua a thug léargas ar thodhchaí dhátheangach na hÉireann don aos óg. De réir lucht eagraithe na hócáide bhí breis agus 5,000 duine i láthair ar an lá, rud a fhágann gur ceann de na himeachtaí Gaeilge is mó riamh a reáchtáladh don aos óg.
Tháinig scoláirí sinsearacha meánscoile, mic léinn ollscoile, gairmithe óga agus ionadaithe ó eagraíochtaí Gaeilge agus stáit le chéile don imeacht a bhí mar chuid de Sheachtain na Gaeilge. Bhí níos mó ná 100 seastán ar fáil chomh maith le trí phléphainéal agus clár leathan ceardlann a dhírigh ar na deiseanna éagsúla a bhaineann leis an nGaeilge i saol an lae inniu.
Ba é príomhaidhm na comhdhála ná a léiriú gur buntáiste láidir sa bhreis í an Ghaeilge i saol acadúil, gairmiúil agus sóisialta na ndaoine óga. Bhí deis ag freastalaithe bualadh go díreach le daoine a úsáideann an Ghaeilge ina gcuid oibre agus eolas a fháil faoi ghairmeacha i réimsí ar nós na meán, na teicneolaíochta, an oideachais, an ghnó agus na hearnála poiblí.
Bhí trí zón ar leith mar chuid den chomhdháil. Sa zón GAIRM, thug eagraíochtaí agus gairmithe eolas do dhaoine óga faoi dheiseanna fostaíochta trí Ghaeilge. Sa zón POBAIL, bhí clubanna, cumainn agus grúpaí óige ag cur an taobh sóisialta bríomhar den Ghaeilge chun cinn. Idir an dá linn, dhírigh an zón TODHCHAÍ ar ról na Gaeilge i réimsí nua-aimseartha ar nós na hintleachta saorga, cruthú ábhair dhigiteach agus inbhuanaitheacht.
Bhí na pléphainéil ar cheann de na buaicphointí ba mhó ar an lá agus slua mór i láthair chun éisteachta leo. I measc na gcainteoirí a ghlac páirt sna díospóireachtaí bhí DJ Próvaí ón ngrúpa Kneecap, an tionchaire meán sóisialta Éadaoin Fitzmaurice, an t-amhránaí Róisín Seoighe ó IMLÉ agus Ambasadóir Sheachtain na Gaeilge 2026, Caitríona Kenny ó Chomhairle Cathrach Bhaile Átha Cliath, agus Peadar Ó Caomhánaigh, Bainisteoir Cumarsáide sa Roinn Cultúir, Cumarsáide agus Spóirt.
Pléadh réimse leathan ábhar ar na painéil, lena n-áirítear ról na Gaeilge i gcultúr comhaimseartha na hóige, an tionchar atá ag na meáin shóisialta ar chur chun cinn na teanga agus na deiseanna atá ag teacht chun cinn do dhaoine le scileanna dátheangacha.
Bhí ceardlanna agus seisiúin eolais ar siúl freisin a thug treoir phraiticiúil do dhaltaí agus do mhic léinn maidir le roghanna ollscoile, scoláireachtaí Gaeilge, cúrsaí tríú leibhéal agus scéimeanna cónaithe Gaeilge. Bhí béim ar leith ar scileanna cumarsáide agus ar chruthú ábhair dhigiteach trí Ghaeilge.
Eagraíodh FÍS 2026 ag Conradh na Gaeilge i gcomhpháirtíocht le Gaeilge365, le tacaíocht ón Roinn Forbartha Tuaithe agus Pobail agus Gaeltachta tríd an tionscnamh Gluaiseacht.
Le breis agus 5,000 duine i láthair, na céadta seastán agus díospóireachtaí bríomhara i rith an lae, léirigh an chomhdháil go soiléir go bhfuil spéis agus fuinneamh láidir i measc ghlúin nua na hÉireann maidir le todhchaí na Gaeilge.