Bhí ról fíorthábhachtach ag Coláiste Naomh Eoin ó Inis Meáin i mbliana ag Taispeántas an Eolaí Óig, áit ar chuir an scoil ceithre thionscadal as Gaeilge faoi bhráid an chomórtais, éacht ar leith don aon Ghaelscoil sa tír a rinne amhlaidh i mbliana. Ní hamháin sin, ach ba é Coláiste Naomh Eoin an t-aon Ghaelscoil a bhain Duais na Gaeilge agus gradam mór eile amach chomh maith, nuair a bhuaigh Solomon Ó Gilasáin an Gradam Foriomlán Teicneolaíochta lena thionscadal nuálach faoin athchruthú canúna trí intleacht shaorga.
Ba é togra Solomon AIRID: Ó Chartlann go hAlgartam — canúintí dhíothaithe na Gaeilge a athchruthú le hintleacht shaorga, a bhuaigh an dá ghradam. Rinne an tionscadal iniúchadh ar conas is féidir le córas nua bunaithe ar mheaisínfhoghlaim agus ar athchruthú fóinéiteach frásaí agus fuaimeanna canúna a atógáil ó chartlanna fuaime agus ó chainteoirí dúchais. Cruthaíodh acmhainn dhigiteach a nascann an traidisiún teanga leis an teicneolaíocht chomhaimseartha, rud a bhfuil luach ollmhór cultúrtha agus oideachasúil leis.
Chloe Ní Chonghaile, scoláire sa chúigiú bliain, a chuir an dara tionscadal aonair ó Choláiste Naomh Eoin faoin teideal Fisic Acústaic na Stoirme. Rinne sí staidéar ar an bhféidearthacht fuaimrian agus fuinneamh na dtonn a thomhas le linn stoirmeacha agus na sonraí sin a úsáid chun creimeadh cósta a thuar.