Deich mbliana d’athrú ó bhonn agus d’athrú sóisialta faoi chaibidil i gclár faisnéise nua ar TG4
Is cúis mhórtais do TG4 é GAA 70s – Réabhlóid Shóisialta a chur i láthair, clár faisnéise fada ceiliúrtha dátheangach nua ina dtugtar spiorad ceann de na réanna ba shonraí sna cluichí Gaelacha agus i sochaí na hÉireann chun cuimhne. Tá cuma fhíorálainn ar an scannán, a taifeadadh in 4K, a léirigh Bankos Tales do TG4 le tacaíocht ó Choimisiún na Meán. Tabharfar léargas nach bhfuarthas riamh cheana ar na daoine a bhfuil clú agus cáil orthu as na deich mbliana órga sin sa pheil Ghaelach a mhúnlú.
Sa chlár faisnéise cineamatach seo, atá lánmhothúchánach, tiocfaidh roinnt de na peileadóirí ab fhearr riamh ó Bhaile Átha Cliath, an Gaillimhe agus Ciarraí le chéile arís i ndathanna a gcontae féin chun machnamh a dhéanamh ar a gcairdeas, ar an gcoimhlint agus ar an aistear go Páirc an Chrócaigh. Fítear scéal leanúnach bunaithe ar agallaimh dhúthphearsanta sa chlár seo le míreanna scannánaíochta ón gcartlann nach bhfeictear go minic, athléirithe agus tráthanna cinniúnacha i gcluichí atá fanta i gcuimhne na ndaoine.
Tagann scéalta nár insíodh riamh cheana chun cinn in áiteanna ar nós ghalfchúrsa na Gaillimhe le muintir Bhaile Átha Cliath agus muintir Chathair na dTreabh ag seanchas gar do Chuan álainn na Gaillimhe; agus ar Mhórchuaird Chiarraí, beidh peileadóirí mór le rá ón Ríocht agus ón Ardchathair ag cur is ag cúiteamh faoin ré a mhúnlaigh CLG an lae inniu.