Tá stair cruthaithe i dTuaisceart Éireann agus an Dr Pól Deeds ag toiseacht ar a chuid oibre mar an chéad Choimisinéir Gaeilge riamh ó thuaidh. Ba lá é a raibh fada feitheamh leis ag pobal na Gaeilge.
Ceapadh an Dr Deeds i ndiaidh blianta de dhíospóireachta pholaitiúil, agus tá a cheapachán mar chuid den Acht Féiniúlachta agus Teanga 2022, an chéad uair riamh a tugadh aitheantas reachtúil don Ghaeilge i ndlí na Ríochta Aontaithe. Tá an ról suite i gcreat an chomhaontaithe Ré Nua Cur Chuige Nua, a thug Stormont ar ais in 2020.
Beidh cúraimí suntasacha ar an gCoimisinéir Gaeilge: caighdeáin na gcleachtas is fearr a fhorbairt do bhreis agus céad údarás poiblí, polasaithe nua a ullmhú ar cheisteanna mar chomharthaíocht dhátheangach, soláthar seirbhísí, cumarsáid phoiblí agus oiliúint foirne, agus gearáin ón bpobal a fhiosrú nuair a theipeann ar údaráis na caighdeáin sin a chur i bhfeidhm. Ach tá dualgas lárnach eile fós sa reachtaíocht: comhairle, tacaíocht agus treoir a thabhairt d’údaráis phoiblí maidir le húsáid na Gaeilge, feidhm a bhaineann leis an gCoimisinéir amháin agus nach dteastaíonn comhaontú polaitiúil ina leith.