Tuairiscíodh gur tharraing an t-arm gunnaí nuair a bhí lucht agóide ar an rúidbhealach in Aerfort na Sionainne an tseachtain seo chaite.
Ó thosaigh an cinedhíothú in Gaza is minic gníomhaithe a bheith i mbun agóidíochta lasmuigh agus lastigh den aerfort. Baineann fórsaí armtha na Stát Aontaithe úsáid as Aerfort na Sionainne chun stad agus athbhreoslú agus iad ar an mbealach go háiteanna eile san Eoraip agus sa Mheánoirthear. Toisc gur tír neodrach í Éire is ábhar conspóide é seo. Dár le Rialtas na hÉireann níl cead ag Meiriceá Aerfort na Sionainne a úsáid chun airm a iompar ach níor tharla fiosrúchán riamh ar na heitleáin.
Bhí triúr os comhair Chúirt Dúiche na hInise Dé Domhnaigh agus dúirt ball de na Gardaí gur ndearnadh damáiste ar aerárthach Meiriceánach a bhí pairceáilte thar oíche. Rinneadh an damáiste le múchtóir dóiteáin a athraíodh chun péint spraeála a scairdeadh. Bhí an triúr dúnta isteach i veain in aice leis an aerárthach agus b’éigean do na Gardaí cabhair a fháil ón mbriogáid dóiteáin chun iad a scaoileadh ón veain, a dúirt an Garda. Tá na cosantóirí go léir ar comhaois, 23, agus níl aon choireanna eile déanta acu. Dúirt duine nuair a léadh na cúiseanna gur sárú neodrachta é úsáid Aerfort na Sionainne ag Meiriceá toisc go bhfuil na Meiriceánaigh comhpháirteach sa chinedhíothú i gcoinne na bPalaistíneach.
Tuairscíodh chomh maith go raibh ar údaráis an aerfoirt an t-aerfort a dhúnadh ar feadh 30 nóiméad agus go bhfuil na costais mar gheall ar an damáiste coirúil sna mílte euro. Coinníodh faoi choiméad an triúr ar feadh trí oíche ach meastar go bhfaighidh siad bannaí.