Rinne an Páirtí Aontachtach Daonlathach iarracht stop a chur le Archibald cosc a chur ar chainteanna trádála le hIosrael
Grianghraf: Sinn Féin, CC BY 2.0, trí Wikimedia Commons
I ngníomh eile a léiríonn an teannas atá ann sa Tionól faoi láthair, rinne an Páirtí Aontachtach Daonlathach iarracht stop a chur leis an Aire Geilleagair agus an treoir a thug sí do Invest NI. D’ordaigh Caoimhe Archibald do Invest NI stop a chur le cainteanna trádála le hIosrael in éineacht le Rialtas na Ríochta Aontaithe agus Iosrael fós i seilbh críoch sa Phalaistín, agus ag cur cinedheighilt i bhfeidhm sa tír.
Dhiúltaigh an Páirtí Aondachtach Daonlathach don ghníomh agus d’éirigh leo dúshlán an chinnidh a thabhairt de bhrí go bhfuair siad 30 síniú.
Bhí cruinniú speisialta ag an Tionól agus thacaigh seisear airí leis an chinneadh agus bhí ceathrar ina éadan.
Dúirt an tAire Dlí agus Cirt, agus ceannaire Pháirtí na Comhghuaillaíochta, Naomi Long gur cur amú ama é an plé agus dúirt sí nach gcuidíonn sé le rud ar bith.
Dúirt an tAire Geilleagair Caoimhe Archibald gur ghlac sí an chéim stop a chur leis na cainteanna lena chinntiú nach ndéanfaí chinedhíothú in Gaza a chumasú.
Dúirt sí go bhfuil sí tiomanta mar Aire Geilleagair gach rud a dhéanamh faoina cúram chun cearta daoine a chosaint, dlí idirnáisiúnta a dhearbhú agus tacú leis na daoine in Gaza agus sa Phalaistín nach bhfuil cosaint ar bith acu.
Maidir leis an chinneadh mhaígh an LeasChéad-Aire ón Pháirtí Aontachtach Daonlathach, Emma Little Pengelly, go raibh an t-aire ó Shinn Féin ag déanamh gaisce.
Dúirt sí nach féidir le polasaí trádála atá tiomnaithe ag polaitíocht a bheith ann mar gheall ar dhearcthaí an aire. Dúirt sí fosta go raibh an cinneadh conspóideach agus gur chóir dó dul faoin fheidhmeannas ar son a fhaofa.
Is achrann eile san fheidhmeannas é seo a léiríonn go bhfuil na páirtithe ag amharc chun tosaigh i dtreo an toghcháin a bheas ar siúl in 2027.