D’fhógair an tAire Forbartha Tuaithe, Pobail agus Gaeltachta, Dara Calleary TD, infheistíocht shuntasach €4.9 milliún in acmhainní digiteacha Gaeilge in Ollscoil Chathair Bhaile Átha Cliath, rud a chuirfidh borradh nach beag faoi thograí taighde, teanga agus nuálaíochta sna blianta amach romhainn. Beidh €4,013,886 dírithe ar chórais Gaois thar an tréimhse 2026–2029, agus €900,000 eile ar an tionscadal eSTÓR sa lárionad taighde ADAPT.
Is iomaí duine, ó scoláirí agus iriseoirí go múinteoirí, mic léinn agus an pobal idirnáisiúnta, a bhaineann leas laethúil as na suíomhanna a chuireann Gaois ar fáil: Dúchas.ie, Logainm.ie, Corpas.ie, Canúint.ie agus Ainm.ie. Ina gcuid oibre tugtar rochtain éasca ar ábhar béaloidis, ar logainmneacha, ar chorpais chomhaimseartha, ar thaifid chanúna agus ar bheathaisnéisí Gaeilge, uirlisí fíorthábhachtacha chun teanga agus cultúr na tíre a chaomhnú agus a chur chun cinn.