Tá podchraoladh nua dátheangach ag tarraingt airde i saol na meán Gaeilge agus LADT+, agus é ag gealladh meascán de ghreann, spraoi agus díospóireacht fhiáin faoi chúrsaí an tsaoil. Tugtar gaylinn ar an gclár, atá urraithe ag Camile Thai, agus is iad Cian Griffin, Ciarán Murphy agus Cathal O’Sullivan a threoraíonn an lucht éisteachta trí mheascán spleodrach de scéalta, eachtraí, agus machnaimh, uaireanta dána, uaireanta domhain, ach i gcónaí le greann.
Tá sé mar aidhm ag an bpodchraoladh “an Ghaeilge a chur i gcomhthéacs nua-aimseartha,” dar leis na láithreoirí, trí phlé a dhéanamh ar na hábhair a bhaineann go fírinneach le saol na ngnáthdhaoine, ó cleamhnas i mBaile Átha Cliath go dtí an saol sóisialta ar líne, agus ó na dúshláin a bhaineann le bheith amach is amach mar dhuine LADT+ go dtí an iarracht dul i dtaithí ar an nGaeilge arís. “Ag doirteadh an tae (agus an stór focal) ar feadh an bhealaigh,” mar a deir siad féin.
Is as Cill Mhantáin do Chian Griffin, ar a dtugtar ‘Gaylgeoirí’ ar na meáin shóisialta, le breis agus 35,000 leantóir idir Instagram agus TikTok. Tá cúlra láidir aige i gcúrsaí cumarsáide agus sna meáin Ghaeilge, agus é le feiceáil ar TG4, RTÉ, BBC agus le cloisteail ar 98FM. Tagann Ciarán Murphy, stiúrthóir cruthaitheach agus oideachasóir margaíochta ó Bhaile Átha Cliath, isteach leis an gclár freisin. Cé gur fhág sé an scoil gan mórán Gaeilge, tá sé anois ag forbairt a chumais teanga le breis agus 300 lá i ndiaidh a chéile ar Duolingo, rud a léiríonn tiomantas agus fiosracht.
Is as Contae Laoise do Chathal O’Sullivan, léiritheoir raidió a bhfuil taithí aige le stáisiúin náisiúnta ar nós Today FM agus Newstalk. Cé go raibh Gaeilge mhaith aige óna óige, admhaíonn sé féin go bhfuil sé ag iarraidh a chuid muiníne a chur ar ais sa teanga trí chaint nádúrtha.
Tá an chéad eipeasóid, dar teideal “Gaeilge,” dírithe ar an teanga féin, ar na cúiseanna a bhfuil sí chomh tábhachtach dár bhféiniúlacht, agus ar an tslí ar féidir í a úsáid le greann agus le hoscailteacht sa saol laethúil. Beidh eipeasóid nua ar fáil gach Céadaoin ar Spotify agus Apple Podcasts.
Is féidir an triúr “cairde aeracha” nua seo a leanúint ar Instagram agus TikTok ag @gaylinnpodcast, áit a gcoinníonn siad an comhrá beo, dána agus lán le spraoi, i nGaeilge nó i mBéarla.