Nuair a bhíonn tithe móra faisin an domhain ag lorg an tsnátha is fearr, bíonn Snáth Dhún na nGall Teo i gCill Charthaigh i gContae Dhún na nGall ar a liosta. Agus le cabhair ó Údarás na Gaeltachta, tá an scéal Éireannach iontach seo ag dul i bhfeabhas i gcónaí.
Tá pacáiste infheistíochta €158,495 bronnta ar Shnáth Dhún na nGall Teo, an muileann olla is mó atá fágtha in Éirinn, atá suite i gcroílár na Gaeltachta i gCill Charthaigh.
Tá Snáth Dhún na nGall Teo lonnaithe i gCill Charthaigh ó 2006, agus is iad an príomhdhéantóir snátha olla sníofa in Éirinn. Déanann siad an snáth aitheanta Breac Dhún na nGall. Is é seo an muileann olla is mó sa tír, agus níl mórán muilte sníofa fágtha sa tír.
Tá custaiméirí idirnáisiúnta láidre ag Snáth Dhún na nGall anois, agus tá siad ag soláthar do bhrandaí móra cosúil le Louis Vuitton, Thom Browne, Moncler agus J Crew. Tugann siad earraí do chomhlachtaí áitiúla freisin ar nós Bá Dhún na nGall Teo, Darni Ceard Teo, Rathlin Knitwear, Rossan Knitwear, Molloy & Sons agus Magee Weaving.
Dúirt Chris Weiniger, Bainisteoir Ginearálta Shnáth Dhún na nGall, “Leis an teicneolaíocht nua sa tionscal, tá trealamh nua-aimseartha le fáil agus is féidir linn na meaisíní atá againn a fheabhsú le córais dhigiteacha. Feabhsóidh sé seo an éifeachtúlacht agus an caighdeán. Tuigimid go gcaithfimid infheistíocht a dhéanamh sa trealamh agus sna córais dhigiteacha nua-aimseartha má tá muid le leanúint ar aghaidh.”
Cuirfidh an infheistíocht seo ar a gcumas a gcuid oibre a fheabhsú agus a bheith níos éifeachtaí, agus cinnteoidh sé sin go mbeidh siad ar cheann de na comhlachtaí is fearr i dtionscal na dteicstílí in Éirinn.
Léiríonn an infheistíocht seo an tacaíocht leanúnach atá á tabhairt ag Údarás na Gaeltachta d’fhiontraithe na Gaeltachta agus don chur chun cinn fostaíochta tábhachtach sa cheantar.