Bhí borradh faoin nGaeilge i bPáirc an Chrócaigh Dé Sathairn seo caite, áit ar tháinig scór oifigeach Gaeilge ó chlubanna CLG ar fud na tíre le chéile chun pleananna a phlé agus spreagadh úr a fháil.
Ní raibh an teanga ar imill an imeachta, ach ag a chroílár. Roinneadh scéalta rathúla ó chlubanna a léirigh go soiléir gur féidir an Ghaeilge a chothú agus a cheiliúradh i ngach ceantar. Thug ionadaithe ó CLG Bhaile Buadáin Naomh Éanna, ó CLG Trá Lí na nGael agus ó Ghlór na nGael léargas ar na céimeanna praiticiúla a thug leo bonn i bhFondúireacht Sheosaimh Mhic Dhonncha.
Is comhpháirtíocht idir Glór na nGael agus Cumann Lúthchleas Gael í an fhondúireacht seo, a dhíríonn ar thacaíocht a thabhairt do chlubanna atá ag iarraidh an Ghaeilge a láidriú. Cé go mbíonn an teanga le cloisteáil i bhformhór na gclubanna cheana féin, spreagann an scéim iad chun na hiarrachtaí sin a chur ar bhonn níos struchtúrtha, tomhaiste agus leanúnach.