Cé nach bhfuil fadhbanna na hinimirce agus cúrsaí dídine comh géar is a bhí, is ábhar buartha i gcónaí an méid airgid atá á chaitheamh ag an stát sna réimsí seo.
Dar le figiúirí a d’fhoilsigh an Roinn Leanaí, Comhionannais, Míchumais, Lánpháirtíochta agus Óige an tseachtain seo, tá timpeall 5 mhilliún sa ló á chaitheamh ag an stát le freastal ar lucht iarrtha dídine agus ar theifigh ón Úcráin. Sin €1.4 billiún do na chéad naoi mí den bhliain seo caite.
Tá comhlachtaí faoi leith ag déanamh go maith as an gcaiteachas seo. Mar shampla, fuair an t-óstán Citywest €16.87 milliún ón stát le haghaidh trí mhí den bhliain seo caite, agus fuair Cape Wrath UC, ar chuid den ghnólacht Tetrarch Capital é, €51.27 milliún.
Níos ísle sa scála tá an teachta dála neamhspleách as Ciarraí, Michael Healy-Rae, a luaitear mar aire stáit sa rialtas nua. Fuair sé €172, 680 as teach aíochta dá chuid, Rosemount Guest House, sa tréimhse dheireanach, agus tá €1.2 milliún faighte ag Healy-Rae as an ngnó seo le dhá bhliain anuas.
Sa tréimhse Iúil go Meán Fómhair anuraidh chaith an roinn €265 milliún ar iostas do lucht iarrtha dídine, méadú 11% ar an méid a caitheadh sa tréimhse trí mhí roimhe.