Tá ról fíorthábhachtach ag na meáin Ghaeilge i saol cultúrtha agus daonlathach na tíre seo. Is tríothu a scaiptear scéalta ár bpobal, a chaomhnaítear ár dteanga, agus a thugtar ardán do ghuthanna nach mbeadh cloiste murach iad. Ach ceist mhór atá le cur anois: an bhfuil an tacaíocht atá á fáil acu cothrom, cóir nó fiúntach i gcomparáid leis na meáin Bhéarla?
Ní féidir a shéanadh go bhfuil dul chun cinn déanta le blianta beaga anuas. Tá infheistíocht á déanamh sa chraoltóireacht agus tá forbairtí dearfacha le feiceáil ar ardáin dhigiteacha. Tá obair leanúnach á déanamh ag eagraíochtaí ar nós TG4 agus RTÉ Raidió na Gaeltachta chun ábhar ardchaighdeáin a chur ar fáil don phobal, agus ní beag an t-éacht é sin i gcomhthéacs iomaíochta idirnáisiúnta agus athruithe teicneolaíochta.
Ach níor chóir dearmad a dhéanamh ar na meáin scríofa, croílár agus cnámh droma na hiriseoireachta Gaeilge le fada an lá. Tá nuachtáin ar nós An Páipéar, Tuairisc.ie agus Nós ag déanamh obair ríthábhachtach gach seachtain, ag soláthar nuachta, tuairimíochta agus anailíse trí mheán na Gaeilge. Ina ainneoin sin, tá siad ag feidhmiú i margadh beag, le hacmhainní teoranta agus le dúshláin mhóra maidir le hinbhuanaitheacht airgeadais.
Murab ionann agus mórmheáin Bhéarla, níl bonn láidir fógraíochta ag go leor de na hardáin Ghaeilge, agus bíonn siad spleách go minic ar dheontais stáit nó ar thacaíocht theoranta eile. Cruthaíonn sé seo éiginnteacht leanúnach, rud a chuireann bac ar fhorbairt fhadtéarmach, ar fhostaíocht iriseoirí, agus ar infheistíocht i nuálaíocht dhigiteach.
Is é an fhírinne lom ná go bhfuil bearna shoiléir fós idir an t-aitheantas a thugtar don Ghaeilge i bhfocail agus an tacaíocht a fhaigheann sí i gcleachtas. Má aithnítear gur cuid lárnach dár bhféiniúlacht náisiúnta í an teanga, ba chóir go mbeadh na meáin a chothaíonn í á gcur chun cinn mar thosaíocht chomh maith.
Ag an am céanna tá deis mhór ann. Le forbairt na meán digiteach, podchraoltaí agus ardáin shóisialta, tá deis ag na meáin scríofa Ghaeilge a gcuid ábhar a leathnú agus lucht féachana nua a mhealladh. idir óg agus aosta, sa bhaile agus ar fud an domhain. Ach gan infheistíocht cheart beidh sé deacair an deis sin a bhaint amach.
Ag deireadh an lae tá ceist shimplí ann: an bhfuil muid sásta infheistiú i nglór na Gaeilge, nó an bhfágfaimid ar an imeall í? Má táimid dáiríre faoin teanga, caithfear tacú go láidir, go leanúnach leis na meáin scríofa, lena n-áirítear An Páipéar féin, mar chuid lárnach dár dtodhchaí theanga agus chultúir.