Tá conspóid nua tagtha chun cinn i ndiaidh postáil phoiblí ó Ollscoil na Banríona a dhearbhaigh, dar leis an gCumann Gaelach, an méid a bhí ar eolas le fada ag pobal na Gaeilge ar an gcampas. De réir an chumainn, tá an Ghaeilge “inghlactha” ag an Leas-Sainsiléir Ian Greer agus ag lucht bainistíochta na hOllscoile ar feadh coicíse sa bhliain, le linn imeachtaí ar nós seachtainí cultúrtha, céilithe agus taispeántais scannáin, ach go nglactar cur chuige i bhfad níos srianta léi an chuid eile den bhliain.
Maítear go bhfuil an cur chuige reatha níos seanchaite ná mar a bhí sna 1990í, agus go bhfuil easpa soiléireachta ann maidir le fís fhadtéarmach don teanga. Tagann an cheist seo chun cinn in ainneoin go bhfuil breis agus 100 mac léinn ag déanamh staidéar ar an nGaeilge go laethúil san Ollscoil, chomh maith leis na céadta eile atá ag freastal ar ranganna in ionad teanga na hollscoile.
Chuir an Cumann Gaelach in iúl go bhfuil sé ar intinn acu easpa muiníne a léiriú i lucht bainistíochta sinsearach na hinstitiúide maidir le forbairt agus cur i bhfeidhm polasaí cuimsitheach Gaeilge. Deir siad gur comhartha leisce é nár foilsíodh amlíne shoiléir, thrédhearcach phoiblí don pholasaí sin go fóill, agus go bhfuil ar an gcumann agus ar mhic léinn eile brú leanúnach a chur ar an ollscoil chun céimeanna cinnte a ghlacadh i dtreo comhionannas teanga.
I gcomhfhreagras leis an gcumann an tseachtain seo caite dhearbhaigh an ollscoil go mbeidh “cur chun cinn na Gaeilge léirithe sa straitéis deiridh um chomhionannas, ilchineálacht agus ionchuimsitheacht”. Tagann sé seo i ndiaidh gur eisiadh an Ghaeilge as dréachtstraitéis 2026–2029 um chomhionannas, ilchineálacht agus ionchuimsitheacht, rud a chuir míshástacht agus mearbhall ar phobal na Gaeilge ar an gcampas.
Mar chuid den fheachtas, beidh reifreann ar siúl idir an 10 agus an 19 Márta faoin mana ‘Comhionannas Teanga’. Iarrfar ar mhic léinn tacú le hathbhunú comharthaíochta dátheangaí in Aontas na Mac Léinn láithreach, agus le gealltanas foirmiúil ón ollscoil polasaí cuimsitheach Gaeilge a fhorbairt, lena n-áireofar féiniúlacht chorparáideach dhátheangach amach anseo.