Sraith nua shiamsaíochta An Deis le craoladh ar TG4
Craolfar an chéad chlár den tsraith nua shiamsaíochta An Deis ar TG4 Dé Domhnaigh an 8 Márta ag 7.30pm. Athchraolfar é Déardaoin an 12 Márta ag 7.30pm.
Tá an tsraith deich gclár á léiriú ag Tyrone Productions do TG4 agus is formáid bhunaidh í a chruthaigh Gavin Cox agus Slam Media, comhlacht léiriúcháin atá lonnaithe sa Bhreatain Bheag.
Is éard a dúirt Laura Ní Cheallaigh, eagarthóir coimisiúnaithe na sraithe, “Tá TG4 thar a bheith sásta a bheith páirteach sa tionscadal seo chun leagan Gaeilge den tsraith An Deis a thabhairt chun beatha do lucht féachana TG4. Tá sé mar sprioc againn i gcónaí formáidí nua a fhorbairt sna teangacha Ceilteacha agus tacú leo, agus is sampla iontach é an comhoibriú seo le S4C de chomhpháirtíocht chruthaitheach i mbun gnímh. Thuig muid láithreach gur bhain rud éigin speisialta leis an bhformáid seo, agus is fada linn í a roinnt lenár lucht féachana.”