Bhí lá lán fuinnimh agus foghlama ag ambasadóirí an fheachtais #AndSheCycles le déanaí agus iad faoi thraenáil ag an Veileadróm Sundrive i mBaile Átha Cliath. Tháinig daltaí ó St Joseph’s, an Ros, Scoil Chaitríona i nGlas Naíon agus Coláiste Íosagáin i gCúil an tSúdaire, Contae Laoise le chéile chun taithí uathúil a fháil ar an raonrothaíocht i dtimpeallacht shábháilte spreagúil.
Le linn an tseisiúin, d’fhoghlaim na cailíní scileanna tábhachtacha maidir le láimhseáil rothar agus conas rothaíocht a dhéanamh go compordach ar an rásraon. Cuireadh béim ar fhéinmhuinín agus ar obair foirne, agus spreag na rannpháirtithe a chéile chun dul i ngleic leis na dúshláin nua. Dúradh go raibh sé “mar aidhm ag an lá féinmheas, misneach agus grá don rothaíocht a chothú i dtimpeallacht dhearfach spraíúil,” agus is léir gur éirigh go hiontach leis sin.
Tá an clár #AndSheCycles dírithe ar níos mó cailíní a mhealladh i dtreo na rothaíochta, go háirithe mar bhealach chun dul ar scoil, agus ar an mbearna inscne sa réimse seo a laghdú. I rith na bliana, bhí na hambasadóirí ag reáchtáil feachtais ina scoileanna féin agus ina bpobail, ag spreagadh a bpiaraí chun páirt a ghlacadh.
Ag labhairt dó faoin tionscnamh, dúirt Bainisteoir Rannpháirteachais Rothaíocht Éireann, Paul Norton, “B’iontach an rud é na hambasadóirí #AndSheCycles a fheiceáil ó gach cearn den tír ag tabhairt faoi dhúshlán nua agus ag triail disciplíní éagsúla rothaíochta. Le tacaíocht agus treoir na gcóitseálaithe, rinne na cailíní dul chun cinn dochreidte ó scileanna bunúsacha go dtí muinín iomlán ar an raon.”
Dúirt sé freisin, “Ba léir an spraoi a bhí acu agus an tacaíocht a thug siad dá chéile. Tá súil agam go dtabharfaidh an taithí seo an misneach dóibh dul i mbun dúshlán nua amach anseo.”
Ghabh Scoileanna Glasa buíochas le Rothaíocht Éireann as a dtacaíocht leanúnach, agus is léir go bhfuil todhchaí gheal roimh chailíní na rothaíochta in Éirinn.