Tá uasghrádú suntasach fógartha ar an scéim tacaíochta Glór Ár Linne, atá á reáchtáil ag Raidió Rí-Rá le tacaíocht ó Éire Ildánach agus Comhairle Cathrach Bhaile Átha Cliath, chun breis tacaíochta a chur ar fáil do cheoltóirí Gaeilge ar fud na tíre.
Seoladh an scéim den chéad uair anuraidh, agus i mbliana tá sí á leathnú go suntasach le pacáiste cuimsitheach seirbhísí a thairiscint. Áirítear orthu sin traenáil agus meantóireacht ghairmiúil, ceardlanna le saineolaithe san earnáil, tacaíocht preasa agus poiblíochta, seisiúin scríbhneoireachta, deiseanna stiúideo, agus úsáid spásanna cruthaitheacha.
Beidh sraith ócáidí beo ar siúl ó Mhárta 2026 i mBaile Átha Cliath, a chruthóidh ardán nua do cheol na Gaeilge, chomh maith le tacaíocht agus maoiniú do ghigeanna féineagraithe. Ina theannta sin, tá bunachar náisiúnta á fhorbairt chun ceoltóirí a nascadh le féilte agus le heagraithe imeachtaí.
Tá ceoltóirí nua agus seanbhunaithe á lorg anois le clárú don bhunachar, a chuirfear os comhair dreamanna ar nós Festival Republic, na Picnice Leictrí, Fhéile na Gealaí agus MCD.
Tá an clár oiliúna á stiúradh ag Cara Dunne, a dúirt go bhfuil an tallann ann cheana féin agus gur gá an t-ardán ceart a chur ar fáil di. Dar léi, tá an scéim dírithe ar cheoltóirí atá dáiríre faoina gceird agus ar mian leo dul i bhfeidhm ar an earnáil cheoil in Éirinn agus thar lear.
Dúirt Bainisteoir Raidió Rí-Rá, Emma Ní Chearúil, go bhfuil ról lárnach ag an gceol sa saol trí Ghaeilge, agus go bhfuil sé mar sprioc acu tacú leis an gcéad Kneecap, RÓIS nó Huartan eile. Dúirt sí freisin go mbeidh ardán ar fáil do na ceoltóirí ar Raidió Rí-Rá agus ar Rí-Rá ar RTÉ Raidió na Gaeltachta.
Is féidir le ceoltóirí nua agus reatha iarratas a dhéanamh ar an scéim trí na foirmeacha ar líne atá ar fáil anois.
Is feidir le ceoltóirí nua iarratais a dhéanamh do Glór Ár Linne ar líne, nó is feidir le ceoltóirí reatha iarratais a dhéanamh anseo.