Bhí níos mó comhaltaí mná i Mná na Léinte Gorma, na mná a bhí in eagraíocht mhíchlúiteach Uí Dhubhthaigh, na Léinte Gorma, sa bhliain 1933 ná mar a bhí i gCumann na mBan, Bantracht na Tuaithe agus gach eagraíocht ban eile in Éirinn. Ach sa lá atá inniu ann, níl mórán daoine ar chor ar bith ann a bhfuil trácht cloiste acu fúthu.
Sa chlár faisnéise nua uair an chloig seo, Mná na Léinte Gorma, a chraolfar ag 21:30 Dé Céadaoin an 4 Márta ar TG4, fiosrófar scéal dearmadta na mban a d’eagraigh, a rinne slógadh agus a raibh tionchar acu ar cheann de na gluaiseachtaí polaitíochta ba chonspóidí i stair na hÉireann.
Comhlacht léiriúcháin i gCorcaigh, Bo Media, a léirigh an clár faisnéise seo, ina bhfiosraítear Mná na Léinte Gorma, eagraíocht na mban laistigh de na Léinte Gorma, agus déantar iniúchadh ar an bhfáth a ndearnadh dearmad ar eagraíocht ban a bhí chomh cumhachtach sin i stair na hÉireann. Léireofar le hábhar cartlainne agus le hanailís ó shaineolaithe an chaoi a raibh baint ag na mílte gnáthmhná measúla le heagraíocht a bhí i bhfách le réimsí Faisísteacha sna 1930í, agus an méid a léiríonn sé sin faoi inscne, faoi chumhacht, agus faoin saol polaitiúil go luath i Saorstát Éireann.
De réir mar a tháinig idé-eolaíochtaí údarásaíocha chun cinn ar fud na hEorpa, tháinig siad chun cinn in Éirinn chomh maith. Feictear in Mná na Léinte Gorma an chaoi a ndeachaigh eagla, creideamh agus an gá le hord i bhfeidhm ar rannpháirtíocht na mban. Déanfar iniúchadh ar na rudaí a spreag iad, ar a neamhréitigh agus ar na himpleachtaí dorcha a bhain le bheith páirteach sa ghluaiseacht a raibh siad ag tacú léi. Seachnaíonn an clár faisnéise seo breithiúnais éasca agus déantar athscrúdú criticiúil agus casta ar ghníomhaireacht pholaitiúil na mban tráth a raibh athrú sóisialta ollmhór ag tarlú.
Tosaíonn an clár faisnéise i dTuaim i gCo. Chorcaí, áit ar cuireadh an chéad bhrainse de Mhná na Léinte Gorma ar bun, agus feictear leathnú sciobtha na heagraíochta go náisiúnta. Dírítear ar phearsana amhail an Seanadóir Kathleen Browne agus an Teachta Dála Bridget Mary Redmond, mná a bhí gníomhach go polaitiúil a bhfuil neamhaird á déanamh ar na róil a bhí acu le fada i bpríomhchuntais faoin tréimhse.
Is é Patrick O’Shea a léirigh Mná na Léinte Gorma, ina bhfuil ábhar ó staraithe agus ó thráchtairí mór le rá, an Dochtúir Owen O’Shea, an Dochtúir Megan McAuley, an Dochtúir Pat McCarthy, Cuan Ó Seireadáin, Comhairleoir Fhine Gael Brídín Murphy agus iar-Leas-Cheannaire Fhianna Fáil, Mary Hanafin, san áireamh.
Clár dátheangach i nGaeilge agus i mBéarla é seo atá bunaithe i gCathair agus i gContae Chorcaí a rachaidh i bhfeidhm ar dhaoine ar fud na tíre agus a spreagfaidh comhráite faoin antoisceachas, inscne, féiniúlacht agus an chaoi a gcuimhnítear ar nithe agus ar dhaoine éagsúla go stairiúil. Sna 1920í rinne Cogadh na Saoirse agus Cogadh na gCarad réabadh ar fud na hÉireann. Is sna 1930í a cuireadh an tír ar ais le chéile arís, ag leagan na dúshraithe d’Éirinn an lae inniu.
‘Mná na Léinte Gorma’, Dé Céadaoin an 4 Márta ag 21:30 ar TG4.