Tá obair ullmhúcháin le tosú an tseachtain seo chugainn ag Páirc Mhic Ásmaint in iarthar Bhéal Feirste, mar chuid den phróiseas athfhorbartha atá beartaithe don staidiam stairiúil, dar leis an gCéad-Aire, Michelle O’Neill.
I ráiteas ar na meáin shóisialta, chuir O’Neill fáilte roimh an bhfógra agus dúirt sí go gcreideann sí go láidir i gcumhacht an spóirt agus sa tionchar fadtéarmach a bhíonn aige ar shaol daoine, ar phobail áitiúla agus ar an ngeilleagar. Dúirt sí gur tosaíocht lárnach don Fheidhmeannas é staidiam nua a thógáil ag Páirc Mhic Ásmaint, agus go gcaithfidh gach páirtí oibriú as lámha a chéile chun fís athraitheach don spórt a chur i gcrích.
Tagann an fógra seo i ndiaidh dul chun cinn suntasach le seachtain anuas, nuair a léirigh Feidhmeannas Thuaisceart Éireann go raibh siad sásta maoiniú breise a chur ar fáil chun brú an bhoilscithe a chur san áireamh. Dúirt Príomhfheidhmeannach CLG Uladh, Brian McAvoy, le déanaí go bhfuiltear ag súil anois go rachaidh an tionscadal isteach sa chéim seachadta in 2026.
Tá moill fhada curtha ar an tionscadal thar na blianta. Cuireadh cead pleanála don staid le hacmhainn 38,000 duine ar ceal in 2014 tar éis athbhreithnithe breithiúnaigh. Cé gur ceadaíodh leagan nua in 2021 do 34,500 duine, mhéadaigh costais an tionscadail go mór de bharr an bhoilscithe, ó £78.5 milliún go dtí tuairim is £260 milliún.
Tá maoiniú dearbhaithe faighte ó Stormont, ó Pháirc an Chrócaigh, ó Rialtas na hÉireann agus ó Rialtas na Ríochta Aontaithe. Dheimhnigh CLG Uladh go mbeidh glanadh an tsuímh agus leagan foirgneamh seanbhunaithe san áireamh san obair thosaigh, agus go leanfar de theagmháil le cónaitheoirí áitiúla agus le heagraíochtaí pobail de réir mar a théann an tionscadal ar aghaidh.