Sraith nua de Geantraí le craoladh ina ndéanfar ceiliúradh ar cheol traidisiúnta na hÉireann ar fud na tíre, á cur i láthair ag Pauline Scanlon.
Tá Geantraí ar ais don fhicheadú sraith. Is í Pauline Scanlon a chuirfidh an tsraith i láthair, ina ndéanfar ceiliúradh ar thraidisiún beo cheol na hÉireann sa bhaile agus thar lear. Ó sheisiúin bheaga i dtithe tábhairne go moil fhuinniúla cheoil in Éirinn, i Londain agus i Manchain, cuirtear ceoltóirí den scoth, foinn nua agus na pobail a choinníonn an traidisiún beo i lár an aonaigh sa tsraith seo.
Tá Geantraí, an tsraith cheoil thraidisiúnta Éireannaigh a bhfuil an-tóir uirthi, ar ais dá ficheadú sraith le cur chuige úr a léiríonn saibhreas agus éagsúlacht cheoil na hÉireann ar bhealach nach bhfacthas riamh cheana. Tabharfaidh an tsraith nua, arna cur i láthair ag an amhránaí iomráiteach Pauline Scanlon, an lucht féachana ar thuras ó Londain go hInis Mór ag fiosrú thraidisiún bríomhar ceoil na hÉireann in ionaid bheaga, phearsanta agus go minic faoi cheilt, sa bhaile agus thar lear.
Cuirfear tús leis an tsraith 12 chlár seo i gContae Chill Dara i dteach tábhairne iomráiteach Brady’s i Maigh Nuad a bhfuil cáil air as a radharc ceoil thraidisiúnta. As sin, rachaidh Geantraí ar fud na hÉireann go dtí an Clár, Doire agus Corcaigh agus trasna na farraige go hInis Mór, Londain agus Manchain. Tarraingeofar aird ar an mbealach ar ionaid cheoil nach bhfuil mórán aithne orthu, áiteanna a mbíonn daoine cumasacha na háite faoi bhláth i gcroílár thraidisiún an tseisiúin Éireannaigh. Casfar foinn agus amhráin nuachumtha don lucht féachana mar aon le léargas mealltach a thabhairt dóibh ar cheol na hÉireann atá ag síorathrú, gach oíche Dé Domhnaigh.
Anuas ar an turas náisiúnta, craolfar eagrán speisialta Lá Fhéile Pádraig sa tsraith seo de Geantraí a taifeadadh sa Mhuir Chairib ar bord an Folk ’n Irish Cruise le Joanie Madden. Le ceol traidisiúnta na hÉireann le cloisteáil ar chladaí trópaiceacha, déanfar ceiliúradh sa chlár speisialta seo ar an gceol agus ar a phobal domhanda, ag léiriú go bhfuil an traidisiún fós faoi bhláth i bhfad ó chóstaí na hÉireann.
“Bhí traidisiún beo cheol na hÉireann i gcroílár Geantraí riamh,” a deirtear. “Leanfaidh an tsraith seo leis an gceiliúradh sin tríd an gceol agus a chuid cruthaitheoirí a chur chun cinn. Dhíríomar ní hamháin ar na léirithe, ach ar na háiteanna ina dtarlaíonn na seisiúin, an áit is láidre ina mbuaileann croí chultúr na hÉireann.”
Cuirtear oidhreacht leanúnach Geantraí chun cinn leis an tsraith nua seo agus athnuachan déanta ar an gclár mór le rá. Sna 16 bliana atá sí ar an aer, tá an tsraith ag cur ardán ríthábhachtach ar fáil do líon mór ceoltóirí Éireannacha. Tá sé geallta ag Geantraí 2026 go dtarraingeofar aird arís eile ar bhrí agus ar bheocht an cheoil thraidisiúnta i bpobail ar fud na hÉireann agus níos faide i gcéin. Taispeánann Geantraí, a dhéantar a thaifeadadh ag seisiúin shuaimhneacha i dtithe tábhairne agus in ionaid bheaga, an ceol san fhoirm is glaine, mar aon leis an gceangal domhain a bhíonn idir na ceoltóirí agus a lucht éisteachta.
“An ceangal idir an ceol agus an pobal a thaispeántaí riamh ar Geantraí,” a deir Paschal Cassidy, Stiúrthóir Hedgerow Films, a bhfuil stiúir glactha acu ar an tsraith anois tar éis blianta fada a bheith caite acu bainteach leis an gclár. “Trí theicneolaíocht nua-aimseartha scannánaíochta agus fuaime a úsáid, táimid ag taifeadadh na draíochta sin ar bhealach a rachaidh i bhfeidhm ar lucht leanúna seanbhunaithe an cheoil thraidisiúnta agus ar lucht féachana nua araon.”
Tá Hedgerow Films ag taifeadadh cláracha ar fud na tíre le míonna beaga anuas agus ag cur béim ar ionaid cháiliúla agus ar réigiúin nach mbítear ag fiosrú chomh minic sin i saol cheol traidisiúnta na hÉireann. Léiríonn an cur chuige seo fairsinge agus éagsúlacht an traidisiúin, agus léiríonn sé go muiníneach a thodhchaí bhríomhar.
Bunaíodh Geantraí ar dtús mar ardán do cheol beo tíre agus traidisiúnta na hÉireann i suíomh suaimhneach, agus leanann an tsraith ag tabhairt ómóis don spiorad sin agus ag cur ardáin ar fáil do thallann nua agus do cheol nuachumtha, rud a chinntíonn forbairt na sraithe atá fréamhaithe go daingean fós sa traidisiún.
Craolfar Geantraí ar TG4 gach oíche Dé Domhnaigh ón 18 Eanáir ag 11 pm, agus ag 10.30pm ón 25 Eanáir ar aghaidh.