Tá ríméad ar Fíbín Media an dara sraith de Síorstíl, comórtas ceannródaíoch faisin, ina gcuirfear dúshlán ar sheachtar dearthóirí cumasacha sárshaothair ardfhaiseanta a dhéanamh d’ábhar dara láimhe agus athchúrsáilte, a fhógairt. Is í Sinéad Ní Uallacháin a chuirfidh an tsraith i láthair agus is iad Deidre Allen agus Ándría Uí Thaidhg a bheidh ina moltóirí. Tá níos mó i gceist le Síorstíl ná comórtas. Is gluaiseacht atá ann ina gcuirfear iallach orainn smaoineamh arís ar an gcur chuige atá againn i leith cúrsaí faisin i ndomhan nua-aimseartha.
Tabharfaidh na hiomaitheoirí aghaidh ar dhúshláin éagsúla dearaidh i ngach clár a thástálfaidh na scileanna atá acu i gcúrsaí inbhuanaitheachta, nuálaíochta agus stíle. Bronnfar an duais mhór ar an dearthóir is mó atá ábalta an chumhacht bhunathraitheach a bhaineann le cuspóir nua a thabhairt d’earraí ach an bua cruthaitheach atá ag teastáil chun éadaí ardfhaiseanta a chruthú a léiriú ag an am céanna. Beidh aoi-mholtóir a bhfuil ceangal acu leis an dúshlán i dteannta an ghnáthphainéil moltóirí ar gach clár. Áirítear orthu sin daoine mór le rá amhail Eimear O’Reilly, Póilín Nic Géidigh, Virtue Shine, Don O’Neill, Cian Ó Gríofa, agus Ríon Hannora.
Cuirfear tús le céad chlár na sraithe, a bheidh le craoladh an 14 Eanáir, le dúshlán dána ina mbeidh ar na dearthóirí feisteas thar a bheith faiseanta ‘Is Mise’ a chruthú, trí úsáid a bhaint as an éadach dara láimhe agus athchúrsáilte a thugtar dóibh. Cuirfidh an tasc seo ar chumas na n-iomaitheoirí a stíl phearsanta féin a léiriú ón tús. As sin, tabharfaidh na hiomaitheoirí faoi dhúshláin nua gach seachtain ina gcuirfear tástáil ar a gcumas an méid a d’fhéadfaí a dhéanamh as ábhair a bhíonn in úsáid againn gach lá a athshamhlú. Ó fheistis a d’fheilfeadh do Bhród go dtí feistis a bheadh feiliúnach d’fhéile mhór Afracach, níl deireadh ar bith leis na deiseanna.