Bhuaigh Jessie Buckley Gradam Golden Globe don bhanaisteoir is fearr as a ról sa scannán Hamnet ag searmanas na bliana seo i Los Angeles.
Thréaslaigh an tUachtarán Catherine Connolly le Buckley. I ráiteas a eisíodh, dúirt an tUachtarán gur aitheantas thar barr é an gradam ar shaothar eisceachtúil Buckley agus ar ar rath atá bainte amach ag tionscal scannánaíochta na hÉireann i gcoitinne.
Chuir Connolly a comhghairdeas ó chroí in iúl freisin do Paul Mescal, Maggie O’Farrell, Element Pictures agus Wild Atlantic Pictures as ucht a bheith ainmnithe do Ghradam Golden Globe, ag cur síos ar an éacht mar léiriú eile ar neart agus ar chruthaitheacht an tionscail Éireannaigh. Thréaslaigh an tUachtarán leo siúd ar fad a thacaigh le Buckley le blianta anuas agus ghuigh sí gach rath uirthi amach anseo.
Ina hóráid ghlactha ag Gradam Golden Globe, ghabh Buckley buíochas leis an Acadamh agus le foireann agus le haisteoirí Hamnet, ag moladh an spioraid chomhoibrithigh ar an léiriú. Thug sí aitheantas dá comh-ainmnithe, agus ómós ar leith do Julia Roberts, ag cur síos uirthi mar laoch pearsanta. Le greann agus le croíúlacht, tharraing sí aird freisin ar obair na foirne taobh thiar den cheamara sula ndearna sí ceiliúradh ar a grá don aisteoireacht agus don cheird.
Tá muintir Chill Airne ar bís le rath Buckley, dar le Brendan Fuller, a col ceathrair agus láithreoir raidió, ag moladh a cumais, a carachtair agus a hóráide inspioráidí ag Gradaim Golden Globe. Dúirt Fiona Crowley ón scoil stáitse áitiúil go raibh Buckley le feiceáil ó aois óg go raibh a scil, a huirísle agus a grástúlacht an-speisialta, agus go bhfuil an baile an-bhródúil aisti.
Bhain an scannán gradam an scannáin is fearr. Tá gradam rogha na léirmheastóirí 2026 buaite ag Buckley cheana féin, agus tá sí á lua mar iomaitheoir d’ainmniúcháin Oscars.
Is scannán stairiúil drámaíochta é Hamnet ar shaol William agus Agnes Shakespeare, a dhíríonn ar an mbeirt agus iad ag déileáil le bás a n-aonmhic tar éis dó bás a fháil ón bplá. Tá Buckley i ról Agnes, in éineacht leis an aisteoir Éireannach Paul Mescal.
Is as Cill Airne í Buckley, áit ar thosaigh a haistear suntasach i saol na siamsaíochta. Óna céad ról in I’d Do Anything in 2008 go róil mhóra i scannáin ar nós Beast, Wild Rose agus The Lost Daughter, tá moladh forleathan tuillte aici. Tá rath leanúnach uirthi i gcúrsaí scannánaíochta, teilifíse agus ceoil, le Gradam Golden Globe anois curtha lena héachtaí.