Maoiniú €672,000 agus céim mhór chun cinn don Ghaeilge i Maigh Eo
Tá lá suntasach bainte amach ag pobal Bhaile an Róba agus iad ag fáil ceadú oifigiúil don phlean teanga áitiúil ón Aire Forbartha Tuaithe agus Pobail agus Gaeltachta, Dara Calleary TD. Mar chuid den fhógra, dearbhaíodh maoiniú seacht mbliana ar luach €672,000, sin €96,000 sa bhliain, chun cur go straitéiseach leis an bplean agus leis an obair phobail atá beartaithe.
Dúirt an tAire Calleary gur “údar ceiliúrtha” é ceadú an phlean agus gur léiriú é ar obair agus díograis an choiste stiúrtha, Gnó Mhaigh Eo agus pobal áitiúil Bhaile an Róba. “Le tacaíocht leanúnach mo roinne agus Fhoras na Gaeilge, táim cinnte go mbeidh ar chumas an phobail oibriú as lámha a chéile leis na heagraíochtaí atá lárnach i gcur chun cinn na Gaeilge,” a dúirt sé.
Lonnaithe ar imeall na Gaeltachta, ar an taobh thoir de Loch Measca, tá feidhm lárnach ag Baile an Róba ó thaobh seirbhísí poiblí, cultúrtha agus tráchtála don Ghaeltacht i nDúiche Sheoigheach agus i dTuar Mhic Éadaigh. Tá sé mar sprioc ag an bplean úsáid agus eolas na Gaeilge a mhéadú go céimnithe ar feadh seacht mbliana, i gcomhar leis an bpobal agus le heagraíochtaí áitiúla. Cuirfear béim ar oideachas, cultúr, spórt, caitheamh aimsire, seirbhísí poiblí agus gnó.
Cúlra náisiúnta an phróisis pleanála teanga
Is é Baile an Róba an deichiú baile seirbhíse Gaeltachta a ceadaíodh faoin bpróiseas pleanála teanga ó bunaíodh Acht na Gaeltachta 2012. I measc na mbailte eile tá Leitir Ceanainn, Daingean Uí Chúis, Cathair na Gaillimhe, an Clochán Liath, Trá Lí, Dún Garbhán, Caisleán an Bharraigh, Cathair Saidhbhín agus an Clochán.
Go dtí seo, tá 26 limistéar pleanála teanga Gaeltachta faofa ar fud na tíre, chomh maith le trí líonra Gaeilge reachtúla sa stát ó dheas. Inis, Baile Loch Riach agus Cluain Dolcáin. Sa tuaisceart, tá dhá líonra eile, Carn Tóchar agus Iarthar Bhéal Feirste, aitheanta ag Foras na Gaeilge trí phróiseas neamhreachtúil.