Tá comhpháirtíocht cheannródaíoch nua fógartha idir an Tionscadal Coillearnaí Gaelaí agus Conradh na Gaeilge, agus an eagraíocht chomhshaoil tar éis éirí go hoifigiúil ina craobh den eagraíocht teanga den chéad uair riamh. Is é seo an chéad charthanas comhshaoil sa tír a tháinig faoin gConradh, agus táthar á mheas mar chéim mhór i dtreo nasc níos láidre a chruthú idir an Ghaeilge agus caomhnú an dúlra.
Mar chuid den chomhpháirtíocht nua, seoladh grúpa lán-Ghaeilge laistigh de phobal an tionscadail, darb ainm Craobh na Coille. Dé Domhnaigh seo caite, reáchtáil an grúpa a gcéad imeacht riamh, siúlóid bhailithe airgid i nGlean na gCloch, Co. Chill Mhantáin, mar thaca le sprioc mhór mhaoinithe an tionscadail.
Tá an Gaelic Woodland Project ag iarraidh €320,000 a bhailiú chun talamh athdhúlraithe a cheannach ar an gCabhán, ionas go bhféadfar an talamh sin a chur ar ais don dúlra go buan. Dúirt lucht eagraithe na siúlóide go raibh freastal an-phositiúil ar an ócáid agus go raibh atmaisféar láidir pobail agus teanga le brath ar an lá.
Tá obair an Tionscadail Coillearnaí Gaelaí dírithe ar dhá phríomhchuspóir: coillte dúchasacha a chruthú do na glúnta atá le teacht, agus coillte atá ann cheana a chosaint ó speicis ionracha, go háirithe an labhras silín. Le blianta beaga anuas, tá an tSeirbhís Páirceanna Náisiúnta agus Fiadhúlra tar éis an labhras ionrach a bhaint as Tearmann Dúlra Ghleann na gCloch. I mbliana amháin, glanadh 1.5 heicteár den talamh, tar éis ceithre heicteár a bheith cóireáilte cheana sna blianta roimhe sin.
An mhí seo caite, ceannaíodh 100 acra de thalamh foraoiseachta in aice leis an tearmann, agus tá súil ag an Tearmann Coillearnaí Gaelaí an talamh sin a athchóiriú go coill dhúchasach amach anseo.
Dúirt Oisín Ó Néill, duine de bhunaitheoirí an tionscadail, “Tá áthas ar an Tionscadal Coillearnaí Gaelaí a fhógairt go bhfuilimid anois mar bhrainse de Chonradh na Gaeilge, an chéad eagraíocht chomhshaoil riamh a rinne amhlaidh. Mar chuid den chomhpháirtíocht seo, táimid ag seoladh Craobh na Coille mar spás cuimsitheach, éagsúil agus fáiltiúil do chách a bhfuil suim acu an Ghaeilge a úsáid, is cuma cén leibhéal atá acu.”
Bhunaigh Dúghlas de hÍde Conradh na Gaeilge in 1893 leis an teanga a chur chun cinn agus a chosaint. Dar leis na heagraithe, léiríonn an chomhpháirtíocht nua seo go soiléir gur féidir an Ghaeilge, an pobal agus an comhshaol a cheangal go láidir lena chéile ar son na todhchaí.
Tuilleadh eolais ag www.gaelicwoodlandproject.com nó déan teagmháil le 085 731 0667