Bronnadh Cónaitheacht Heinrich Böll d’Ealaíontóirí Gaeltachta ar an fhile Laoighseach Ní Choistealbha agus ar an cheoltóir, fonnadóir agus damhsóir Séamus Ó Flatharta an tseachtain seo. Seo cónaitheacht a bronnadh den chéad uair, i mbliana.
Tá an chónaitheacht á cur ar fáil mar gheall ar chomhpháirtíocht nua idir Ealaín na Gaeltachta agus Cumann Heinrich Böll, agus tabharfaidh sí deis d’ealaíontóirí atá lonnaithe sa Ghaeltacht coicís a chaitheamh i dTeachín Heinrich Böll in Acaill sa bhliain 2026.
Labhair Ceara Conway, Áisitheoir Ealaíon Chonnacht & Chontae na Mí, faoi sprioc na scéime, ag rá, “Is tréimhse chónaitheachta í seo d’ealaíontóirí Gaeltachta a bhíonn ag obair agus ag cruthú trí mheán na Gaeilge. Tugann an chónaitheacht spás agus am d’ealaíontóirí iniúchadh agus forbairt a dhéanamh ar a gcuid cleachtas. Táimid ag súil go mór leis na saothair a thiocfaidh as an deis uathúil seo.”