Cóilín Duffy
Bhuaigh Daingean Uí Chúis craobh shinsearach club na Mumhan ar bhealach thar a bheith drámatúil Dé Domhnaigh i ndiaidh cic buacach ó Chonchúr Ó Géibheannaigh i gcoinne Fhionnbarra Naofa i Stáid Semple. Ba í an cic deireanach den chluiche é agus d’fhág sé lucht leanúna Dhaingean Uí Chúis ar mhuin na muice tar éis corrú mór sa dara leath.
Ag caint i ndiaidh an chluiche, mhínigh Conchúr an eachtra a bhain leis an gcic cinniúnach. “D’fhéach Dylan orm agus dúirt sé go raibh sé ag iarraidh an cic a thógáil ach dúirt mé go raibh sé ar an taobh clé agus go raibh ceart agamsa air, mar bhí sé taobh amuigh den stua. Thóg sin beagán brú uaim. Dá mbeadh sé laistigh den líne 20 méadar, bheinn i bhfad níos neirbhísí. Ní dhearna mé ach mo cheann a chur síos agus buille maith a dhéanamh. Bhí a fhios agam chomh luath is a d’imigh an liathróid ó mo chois go raibh sé díreach,” a dúirt sé. “Bhí sé dochreidte ar fad, an mothúchán is fearr a bhí agam riamh ar pháirc imeartha.”
Ceapadh ar dtús gurbh í sin an cic deireanach den chluiche, cé nach raibh siad cinnte go hiomlán. “Shíleamar gurb ea, sin an fáth gur éirigh mé ón talamh chomh tapa sin. Ar an dea-uair, shéid an réiteoir an fheadóg láithreach, mar ní raibh aon rud fágtha san umar againn,” arsa Ó Géibheannaigh.
Bhí forlámhas an chluiche á mhalartú idir an dá fhoireann, ach dar le hÓ Géibheannaigh ba é tionchar Dylan Geaney a thug Daingean Uí Chúis ar ais sa dara leath. “Chabhraigh Dylan go mór linn. Níl a fhios agam cé mhéad a scóráil sé sa dara leath ach thug sé ar ais sa chluiche sinn. Scóráil sé cúilín dúbailte le cic ard thar an trasnán. Bhíomar sách muiníneach ag leath ama, mar níor shíleamar gur imríomar go dona. Ach na cicanna dhá chúilín a bhí á gciceáil ag Sherlock,16 chúilín san iomlán, níor chuala mé riamh faoi imreoir ag ciceáil 16 chúilín agus fós ag cailliúint. Bhí cic dhá chúilín aige ón taobhlíne sa dara leath a bhí ar fheabhas ar fad.”
Luaigh Ó Géibheannaigh freisin an cúl tábhachtach ó Phól sa chéad leath a choinnigh Daingean Uí Chúis sa chluiche. “D’éirigh linn roinnt ciceanna dhá chúilín a phiocadh as a chéile agus chabhraigh an cúl go mór linn. Táimid ar mhuin na muice leis an mbua seo, an ceann is fearr riamh dúinn.”
Bhí scáil an bhróin fós os cionn an chlub ó chluiche ceannais na Mumhan dhá bhliain ó shin in aghaidh Chaisleán Uí Mhichíl, nuair a chaill siad ar ;chiceanna pionóis. “Ba é sin an lá ba chrua riamh domsa ar pháirc imeartha,” a dúirt Ó Géibheannaigh. “Cheapamar go raibh an dara seans againn an uair seo. Dúirt muid linn féin i rith na seachtaine gurb annamh a thagann seans mar seo timpeall agus go mb’fhéidir nach bhfeicfimis arís é choíche. Bhí orainn greim a fháil air, agus fuaireamar.”
Leis an mbua seo, tá bliain stairiúil eile ag leanúint ar aghaidh do Dhaingean Uí Chúis, agus aisling Chraobh na hÉireann anois beo bríomhar acu agus iad ag ullmhú don chéad chéim eile de chomórtas náisiúnta na gclubanna.