Cathal Ó Murchú
Tá a lán cainte, imní agus plé ann i láthair na huaire maidir le long Rúiseach darbh ainm an Yantar a líomhnaítear gur long spiadóireachta í. Cé nach bhfuil aon chruthúnas leis an líomhain seo, is cinnte go mbíonn spiadóireacht den chineál seo ar siúl ag na Rúisigh agus b’fhéidir go bhfuil an long seo mar chuid de sin. Tá a lán uafáis faoin gcineál seo gníomhaíochta, a chuirtear i leith na Rúiseach, i measc lucht na meán cumarsáide agus i measc lucht na polaitíochta san Aontas Eorpach agus i Meiriceá Thuaidh.
Baineann na líomhaintí seo leis an dubh-bholscaireacht a chothaítear de shíor i dtaobh na Rúise, go háirithe ó thosaigh an cogadh dearg idir an Rúis agus an Úcráin (agus a gcomhghuaillithe ó ECAT) i Mí Feabhra 2022, ach bhí an feachtas frith-Rúiseach ar siúl i bhfad roimhe sin. Maíonn an tIarthar gur thosaigh an Rúis an cogadh seo nuair a rinne siad ionradh ar chríoch aitheanta na hÚcráine ag an am sin. Maíonn na Rúisigh, áfach, gur thosaigh an cogadh seo nuair a ghríosaigh na Stáit Aontaithe agus an tAontas Eorpach ar fhórsaí frith-Rúiseacha uachtarán dlisteanach na hÚcráine, Viktor Yanukovych, a chur as oifig trí bheart athraithe réimis a le linn Réabhlóid Maidan in 2014, agus ó shin rinne an tIarthar seachstát den Úcráin mar uirlis chun tabhairt faoin Rúis.