Léamhthuiscint: Léigh an sliocht thíos agus freagair na ceisteanna a leanas.
Bhí cúpla lá iontach ag Troy Parrott, imreoir sacair an-óg de chuid na hÉireann. San alt seo foghlaimeoimid faoi na buaicphointí in a ghairmréim ghairid.
Rugadh Troy Parrott ar an 4 Feabhra 2002. Is as Rae Portland dó i mBaile Átha Cliath 1 i gcroílár na cathrach. Rugadh é sa cheantar dúchais céanna le Kellie Harrington agus Wes Hoolahan. D’fhreastail sé ar Scoil Uí Chonaill atá suite díreach taobh leis an gCuarbhóthar Thuaidh. D’imir sé peil Ghaelach agus é óg do Scoil Uí Chonaill agus Naomh Iósaf Buachaillí Uí Chonaill.
Thosaigh sé ag imirt sacair le club áitiúil darb ainm Belvedere F.C a imríonn a gcluichí baile i bPáirc Fhionnradhairc. Shínigh sé a chéad chonradh le Tottenham Hotspur nuair a bhí sé 17. D’imir sé a chéad chluiche sa i bpríomhshraith Shasana i gcluiche i gcoinne Burnley. Bhuaigh siad 5-0 ar an lá agus bhí Jose Mourinho ina bhainisteoir orthu ag an am seo. In 2020 shínigh sé conradh nua a mhairfeadh 3 bliana, ach an bhliain dár gcionn chuaigh sé ar iasacht go Millwall. Gortaíodh é go dona sa chos an séasúr seo agus níor imir sé ach 11 uair. An bhliain dár gcionn arís bhog sé go MK Dons ar iasacht agus anseo scóráil sé a chéad cúl sinsir i gcoinne Sunderland. D’fhorbair sé go mór i séasúr 2021-2022 agus scóráil sé 8 gcúl san iomlán.
In 2024 d’fhógair Tottenham gur bhog Parrott go club sacair AZ Alkmar san Ísiltír ar chostas 8 millúin euro. I mbliana is léir go bhfuil sé ag baint sult as a shacar, agus ainmníodh é mar imreoir na míosa san Eredivisie, príomhshraith sacair na hÍsiltíre, i Mí na Nollag 2024. Níl an séasúr thart go fóill agus ta 20 cúl faighte aige.
Go hidirnáisiúnta ta clú agus cáil air anois mar gheall ar an taispeántas a léirigh sé i gcoinne na Poirtaingéile, nuair a scóráil sé dhá chúl, agus i gcoinne na hUngáire, nuair a scóráil sé tréchleas, an chéad imreoir Éireannach a rinne é seo ó Robbie Keane. Agus é 23 bliain d’aois tá súil againn go mbeidh go leor blianta agus cúl eile aige san am amach romhainn.
Ceisteanna buntuisceanna
- Scríobh dhá phíosa eolais maidir le luathshaol Troy Parrott.
- Cé hiad na daoine cáilúla eile ón gceantar dúchais céanna?
- Cén fhoireann i bpríomhshraith Shasana ar thosaigh sé ag imirt leo?
- Scríobh dhá phíosa eolais maidir lena dhul chun cinn an séasúr seo.
Tasc breise
An bhfuil réalta spóirt nó duine cáilúil ó do cheantar dúchais? Déan taighde orthu agus ullmhaigh cur i láthair ar a ngairmréim agus a saol.