D’fhoilsigh an Roinn Oideachais agus Óige plean gnímh don Ghaeilge i scoileanna Béarla agus polasaí don oideachas lán-Ghaeilge lasmuigh den Ghaeltacht an tseachtain seo caite.
Cuirfear an plean gnímh i bhfeidhm le linn tréimhse ama dhá bhliain ó 2025 go 2027. Tacóidh sé le bunscoileanna agus le hiar-bhunscoileanna. Leagtar amach sa phlean gnímh faoi cheithre cholún; dearcadh dearfach a chothú i leith na Gaeilge, úsáid na Gaeilge a mhéadú, tacú le rochtain ag gach leanbh agus duine óg ar fhoghlaim na Gaeilge agus tacaíochtaí don Ghaeilge a chomhtháthú.
An chéad cholún is ea dearcthaí dearfacha a chothú i leith na Gaeilge. Is é is aidhm don cholún seo, tacú le scéimeanna agus imeachtaí a spreagann úsáid thaitneamhach na Gaeilge, mar shampla Gaelbhratach, Seachtain na Gaeilge agus Gaeilge 24. Ina theannta sin, tá d’aidhm aige feasacht a mhúscailt i measc foghlaimeoirí agus úsáideoirí na Gaeilge maidir lena bhfoghlaim teanga féin. Díríonn sé seo ar na hacmhainní atá ar fáil, caighdeáin teagaisc agus curaclam a shoiléiriú.