Grianghraf: Simon Boyle
Bhí deireadh seachtaine eisceachtúil ag Futa Fata le deanaí agus iad ag ceiliúradh fiche bliain ó bunaíodh an teach foilsitheoireachta cáiliúil i gConamara. Reáchtáladh Seó Mór 2025 in Amharclann Chois Fharraige, áit ar thug páistí ó Scoil Sailearna léiriú beo bríomhar ar shaibhreas leabhar Futa Fata, i dteannta Thadhg Mhic Dhonnagáin, Chaitlín Ní Chualáin agus Róise Nic Dhonnagáin.
Cuireadh cláracha agus amhráin cháiliúla chun stáitse arís, lena n-áirítear Gugalaí Gug!, Peigín Leitir Móir, Bliain na nAmhrán agus Ceol na Mara. Bhí spraoi agus beocht go leor leis an lucht éisteachta a mhealladh, le hamhráin, rannta, damhsa agus gáire i ngach aon chúinne den amharclann. Ghlac breis agus dhá scór páistí páirt sa seó, ó na naíonáin bheaga go rang a sé, agus iad go léir ó Scoil Sailearna, Indreabhán.
Bhí Pádraic Ó Flatharta i gceannas ar an léiriú agus ar an stiúradh, agus ba é chomh maith a dhear an seit a thóg Ciarán Mulkerrins. Bhí atmaisféar fíorspeisialta ann ar an Domhnach nuair a shuigh Uachtarán na hÉireann, Catherine Connolly, sa chéad ró ag tacú leis an ócáid stairiúil.
Grianghraf: Simon Boyle
Reáchtáladh trí sheó lán Dé Sathairn agus Dé Domhnaigh, agus seó speisialta do scoileanna Dé Luain, ar fhreastail ranganna ó Scoil Sailearna agus Scoil Ros an Mhíl air. Seó saor in aisce a bhí ann agus líonadh an teach gach lá, cruthúnas ar thionchar leanúnach Futa Fata ar ghlúin iomlán de léitheoirí óga.