Mol pobail na milliún euro á ainmiú ‘Áras Mhíchíl Uí Mhuircheartaigh’
Cóilín Duffy
Tá CLG Dhaingean Uí Chúis ar tí céim mhór stairiúil a thabhairt dá bpobal féin, agus é sin á dhéanamh le meas agus ómós don duine a rinne níos mó ná aon duine eile chun spiorad an bhaile sin a chur i mbéal an domhain. Tá sé fógartha ag an gclub go mbeidh a gcuid áiseanna nua pobail, atá mar chuid d’fhorbairt a chosnóidh na milliúin euro, le bheith ainmnithe in ómós do Mhicheál Ó Muircheartaigh, an craoltóir agus scoláire a bhí chomh dílis sin dá dhúchas agus don Ghaeilge.
Tabharfar ‘Áras Mhíchíl Uí Mhuircheartaigh’ ar an mol pobail nua, croílár tionscadail forbartha atá dírithe ar an teanga, ar an gcultúr agus ar na luachanna a bhí lárnach i saol Mhichíl féin. Meastar go mbeidh an t-áras nua ina shuíomh lárnach do gach gné den saol pobail i gCorca Dhuibhne, ó chruinnithe spóirt agus imeachtaí cultúrtha, go himeachtaí teaghlaigh agus cláir theanga.
Ba dhuine de mhórphearsana cultúrtha na hÉireann é Micheál Ó Muircheartaigh, guth binn na gcluichí Gaelacha le leathchéad bliain anuas. Leis an stíl shainiúil tuairimíochta sin a bhí aige, thug sé beocht, greann agus ceangal pobail don spórt, agus d’fhan sé dílis i gcónaí dá dhúchas iartharach. Is i bhfianaise an ghrá sin dá cheantar agus don Ghaeilge a roghnaíodh a ainm a thabhairt don fhorbairt nua.