Craobh pheile shóisearach na Mí
Clann na nGael 0-17
Naomh Uinseann 1-12
Bhí an-lúcháir le brath ar mhuintir Ghaeltacht Ráth Chairn agus Bhaile Átha Buí an deireadh seachtaine seo caite, agus Clann na nGael tar éis craobh pheile shóisearach na Mí a bhaint den tríú huair ina stair, an chéad uair ó 2019. I gcluiche drámatúil i bPáirc Tailteann, chloígh siad Naomh Uinseann de dhá chúilín, tar éis taispeantas croíúil ó fhoireann Néill Mhic Lochlainn.
Bhí an dá fhoireann ar comhscór agus cúig nóiméad fágtha, rud a d’fhág go raibh an chuma air go mbeadh athimirt ann. Ach ansin tháinig Tomás Ó Dúghaill chun cinn mar laoch na huaire,ag scóráil dhá chúilín ollmhór sa 56ú nóiméad, rud a spreag racht áthais i measc lucht tacaíochta Chlann na nGael. D’fhreagair Paddy Arnold d’fhoireann Phóil Mhic Mhánais le cúilín, ach d’aimsigh Ben Corkery cúilín eile ó chic saor agus dheimhnigh sin gur leo Corn Pheadair Mhic Diarmada.
Ba iad Clann na nGael a thosaigh níos laidre. Bhí seilbh iomlán acu ar an liathróid sa chéad cheathrú agus d’oscail Tomás Ó Dúghaill an scórail le cúilín cruinn sular lean Eoin Kelliher, Pól Tuite, Seán Óg Ó Tiarnáin agus Darragh Swaine lena scóranna féin. Tar éis fiche nóiméad bhí Clann na nGael chun tosaigh 0-5 go 0-0 agus cuma chompordach orthu.