Kate Ní Dhúbhlaoich
Feidhmeannach Cumarsáide Chonradh na Gaeilge
Den chéad uair le breis agus deich mbliana beidh pobal na Gaeilge agus na Gaeltachta ag dul chun sráide i mbun agóid náisiúnta. Dé Sathairn an 20 Meán Fómhair baileoidh na mílte ag Cearnóg Parnell do CEARTA: Agóid Náisiúnta na nGael.
Tá an Ghaeilge faoi bhláth. Cloistear í níos mó ná riamh sa cheol comhaimseartha. Tá borradh tagtha faoi líon na ndaoine atá ag freastal ar ranganna Gaeilge. Ar na meáin shóisialta úsáidtear an Gaeilge le muinín agus le cruthaitheacht. Táimid ag feiceáil go bhfuil an teanga á húsáid níos mó sa saol laethúil, agus is rud é sin le ceiliúradh.
Ach, níl an uaillmhian chéanna don teanga á léiriú ag na rialtais thuaidh agus theas. Tá an ghéarchéim thithíochta ag scriosadh ár bpobail Ghaeltachta. Mura bhfuil an cumas ag daoine óga maireachtáil agus teaghlaigh a thógáil ina gceantair dhúchais, leanfaidh an Ghaeilge ag dul i léig mar theanga phobail. Níl ach 0.10% de bhuiséad an stáit ag dul chuig Roinn na Gaeltachta ó dheas, agus ní théann ach 0.024% de bhuiséad an stáit chuig an nGaeilge ó thuaidh.