Cathal Ó Murchú
Tar éis gur theip ar sheirbhísí faisnáise na Fraince coup d’état a chur i bhfeidhm i bPoblacht Mhailí an tseachtain seo caite agus le ceannaire Burkina Faso Ibrahim Traoré a fheallmharú níos luaithe sa bhliain, tá sé soiléir go bhfuil fíordhrogall ar an bhFrainc droim láimhe a thabhairt dá sean-nósanna impiriúlacha i gceantar na Saiheile san Afraic, áit a raibh impireacht leathan ag an bhFrainc sa naoú haois déag agus san fhichiú haois.
Le blianta beaga anuas tá slam ceannairí nua i dtíortha iarchóilíneacha na Saiheil, Burkina Faso, Mailí, an Nígir is eile. Tá siad tar éis caidreamh nuachóilíneach na Fraince a chaitheamh uathu agus droim láimhe a thabhairt do na seanchleachtaí dúshaothraithe ón bhFrainc go háirithe agus ón Iarthar i gcoitinne. Bhí an chuid is mó de thuaisceart, iarthar agus lár na hAfraice faoina réim ar feadh céad bliain go dtí na 1960í nuair a bhain tíortha nua ansin flaitheas agus neamhspleáchas foirmeálta amach – foirmeálta sa chaoi gur athraigh an caidreamh acusan leis na Francaigh ón gcóilíneachas go dtí an nuachóilíneachas.