Cóilín Duffy
Tháinig na mílte de lucht tacaíochta amach ar fud na Gaillimhe Dé Luain seo caite chun fáilte a chur roimh fhoireann sinsir chamógaíochta na Gaillimhe, tar éis dóibh craobh shinsir Glen Dimplex na hÉireann a bhreith leo den chúigiú huair riamh.
Thosaigh an ceiliúradh go maith, le suas le 6,000 duine i láthair i nDroichead an Chláirín oíche Dé Luain, agus breis is 1,500 bailithe níos luaithe i bPáirc Uí Dhubhagáin, Béal Átha na Slua, chun fáilte a chur roimh a laochra. Las tinte ealaíne spéir na hoíche i nDroichead an Chláirín agus bus na foirne ag teacht go gairid roimh 9 pm, le liú bodhraitheach agus farraige de mharún agus bán.
Ar an stáitse i nDroichead an Chláirín ba luath a d’aithin captaen na Gaillimhe Carrie Dolan an t-atmaisféar dochreidte.