Cé go bhfuil an-bhuairt ann faoin easpa múinteoirí abhus in Éirinn agus na deacrachtaí a bhaineann le daoine oilte a mhealladh chun na gairme, tháinig dhá thuarascáil idirnáisiúnta amach i rith na míosa a léiríonn go bhfuil an tír seo ar na tíortha is fearr ó thaobh oideachais de.
Dar le Visual Capitalist, tá céim ollscoile nó níos airde ag 52.4% den daonra anseo idir 25 agus 64, i gcomparáid le 40.3% sna Stáit Aontaithe, agus 43.6% sa Ríocht Aontaithe.
Go deimhin tá Éire ar bharr an liosta ar fad, an tír is oilte ar domhan dar leis an suirbhé seo, agus sinn chun tosaigh ar an Eilbhéis agus ar Shingeapór.
Agus dar le suirbhé eile ón Eagraíocht um Chomhar agus Forbairt Eacnamaíochta (ECFE), tá mic léinn in Éirinn ó na haicmí is boichte sa tír ag déanamh níos fearr freisin ná a macasamhail i dtíortha eile.