Beidh súil ag curaidh pheile shóisiir na hÉireann, an Cheathrú Rua, go mbeidh a gcúl báire James Ó Flatharta i mbarr a réime an deireadh seachtaine seo agus Comórtas Peile na Gaeltachta ar siúl i Ráth Chairn. Ach an deireadh seachtaine seo is i bhfad ó pháirc na peile a bhí sé – seachas sin bhí sé ag rópáil anuas ó dhíon Staid Anfield sular bhreathnaigh sé ar a fhoireann sacair tabhairt faoi Crystal Palace sa chluiche deireanach de shéasúr an Premier League.
Thaistil James, atá 29 bliain d’aois, lena athair go Sasana don ócáid, iad beirt an-phaiseanta faoi Learpholl, agus d’fhéach siad ar a bhfoireann ag ardú an choirn. Ach an lá roimhe sin, ghlac sé leis an dúshlán rópáil anuas ó cheann de na staidiaim is cáiliúla ar domhan – rud a rinne sé ní hamháin mar eachtra phearsanta, ach mar iarracht airgead a bhailiú do pháistí atá thíos leis an gcogadh i nGaza.
“Chonaic mé cúpla mí ó shin go raibh deis ag daoine rópáil anuas ó dhíon Anfield,” a dúirt sé le An Páipéar. “Tá Anfield anois mór agus nua-aimseartha. Nuair a bhí gach rud curtha in áirithe agam, shíl mé gur leithscéal maith a bhí ann chun airgead a bhailiú do chúis mhaith.”