Tá Gearóid Ó hÉalaithe, Cathaoirleach CLG Chill na Martra, lán dóchais go n-éireoidh go geal le Comórtas Peile na Gaeltachta i mbliana i Ráth Chairn. Ag labhairt dó le An Páipéar, chuir sé in iúl a mhuinín i bpobal Ráth Chairn go gcuirfidh siad ar fáil deireadh seachtaine den chéad scoth, tar éis do Chill na Martra cúraimí ósta a chur díobh anuraidh.
“Ní hé an club a ritheann cumann an Comórtas, ach an pobal,” a dúirt sé go bródúil. “Bhí go leor cruinnithe againn le muintir Ráth Chairn le bliain anuas, agus bhí siad thar cionn – níl dabht orm ach go mbeidh gach uile rud réidh.”
Thug sé le fios gur thug an taithí óstála a fuair Cill na Martra anuraidh leo tuiscint dhomhain dóibh ar an ar an leibhéal ullmhúcháin a theastaíonn. “Ní féidir leat seo a chur i gcrích gan pleanáil cheart – agus is cinnte go bhfuil an obair déanta ag Ráth Chairn.”
Rachaidh Chill na Martra chun páirce arís i mbliana, agus cé gur de bhearna bheag a chaill siad an cluiche leathcheannais anuraidh in éadan Chill Chartha, tá Ó hÉalaithe dóchasach go gcruthóidh siad go maith arís.
“Tá an comórtas seo fíorthábhachtach dúinn – bíonn muid ag tnúth leis gach bliain. Bhí seans mór againn anuraidh, agus cé gur tháinig deireadh lenár n-aistear sa chluiche leathcheannais, bhí deireadh seachtaine den chéad scoth againn. Bhí an aimsir foirfe, agus bhí gach rud eile – bainistíocht, lóistín, ceol, spraoi agus an Ghaeilge – go hiontach.”
Tá sé ag súil le hiomaíocht láidir arís i mbliana, le foirne láidre cosúil le Naomh Anna Leitir Móir, Bhuilf Tón, an Ghaeltacht agus an Tearmann go léir san iomaíocht.
“Bhí cluiche leathcheannais fíordheacair againn i gcoinne Bhuilf Tón in 2023. Má tá siad chomh láidir sin arís, beidh dúshlán mór ann. Ach sin é croílár an chomórtais – níl aon ráthaíocht ann, agus is féidir le haon fhoireann an bua a fháil.”
Dúirt sé freisin cé go bhfuil buntáiste ag foirne baile, bíonn dualgais bhreise ar na himreoirí agus lna meantóirí araon.
“Caithfear a bheith réidh do gach rud – ar an bpáirc agus taobh amuigh di. Ach tá a fhios agam go bhfuil Ráth Chairn réidh – tá siad tar éis obair mhór a dhéanamh.”
Ar deireadh, ghabh sé buíochas le gach duine a bhí páirteach sa chomórtas anuraidh i gCill na Martra agus ghuigh sé gach rath ar phobal Ráth Chairn i mbliana:
“Go n-éirí libh go léir – beidh muid ar ais ar an bpáirc agus sa spraoi ag deireadh na seachtaine!”