Captaen na foirne, Holly Ní Mhacaín, ar bís agus í ag súil le deireadh seachtaine speisialta sa bhaile
Cóilín Duffy
Tá captaen bhanpheileadóirí Chlann na nGael, Holly Ní Mhacaín, ag tnúth go mór leis an deis a gcraobh i gComórtas Peile na Gaeltachta a chosaint i Ráth Chairn an deireadh seachtaine seo.
Bhain foireann Ghaeltacht na Mí craobh na sóisear amach anuraidh i gCill na Martra, le bua 2-12 in aghaidh Naomh Fionnbarra. Anois agus an comórtas ar siúl ina mbaile féin, tá fuadar ag méadú.
“Seo an tríú bliain san iomaíocht dúinn – thosaíomar i Leitir Móir. Ba é sin an chéad uair do Chlann na nGael a bheith páirteach agus tá bealach fada curtha dínn againn ó shin,” a dúirt sí le An Páipéar.
“Bhí bua na bliana seo caite go hiontach, ach tá sé difriúil i mbliana. Táimid ag imirt i Ráth Chairn. D’fhreastailíomar uilig ar an scoil áitiúil anseo. Beidh ár múinteoirí, ár gcomhghleacaithe agus ár dteaghlaigh uilig ann. Tá sé speisialta.”
Admhaíonn Ní Mhacáin go bhfuil brú breise ann i mbliana. “Is brú é atáimid a chur orainn féin, mar sin féin. Táimid ag iarraidh go mbeidh ár bpobal bródúil asainn.”
Beidh Clann na nGael ag tabhairt aghaidh ar na Gaeil Óga as Baile Átha Cliath Dé Sathairn ag 2 pm, beo ar YouTube Spórt TG4. “Bíonn i gcónaí iomaíocht láidir idir an Mhí agus Baile Átha Cliath – ní bheidh an cluiche seo éagsúil.”
Le himreoirí idir 16 bliana d’aois agus lár na dtríochaidí, deir Holly go bhfuil spiorad iontach sa scuad. “Is grúpa dlúth sinn agus tacaímid le chéile i gcónaí.”
Tar éis cailleadh le bearna bheag in aghaidh Bhaile Átha Troim sa chluiche leathcheannais anuraidh, tá dóchas ag Clann na nGael preabadh ar ais níos láidre. “Tá níos mó leanúnachais agus traenáil mhaith againn le déanaí.”
Tá Ní Mhaicín, atá 19 mbliana d’aois, bródúil as bheith ina captaen ar a foireann os comhair slua baile, agus í ag tosú ar phost nua in KPMG Dé Máirt. “Tá súil agam go mbeidh mé ag ceiliúradh bua sula n-imeoidh mé go Baile Átha Cliath!” a deir sí le gáire.