Gaeilge á labhairt ag imreoir sacair Éireannach

Domhnall Mac Concharraige

Léamhthuiscint: Léigh an sliocht thíos agus freagair na ceisteanna a leanas.

Ar an nGaeilge a d’iompaigh duine d’imreoirí sacair na hÉireann chun a bhród a léiriú tar éis dó a chéad chluiche os comhair slua a imirt d’fhoireann sinsir na tíre i mBaile Átha Cliath.

An 7 Meán Fómhair 2021 bhí Andrew Omobamidele ar fhoireann na hÉireann a chríochnaigh ar chomhscór 1-1 leis an tSeirbia i gcluiche cáilithe do Chorn an Domhain 2022 i gCatar.

Ba é sin an dara cluiche ag Omobamidele, atá 19, ag imirt le foireann na hÉireann agus ba léir gur bhain sé taitneamh as an ócáid agus 25,415 duine i láthair i Staid Aviva den chéad uair ó scaoileadh cuid de na srianta dianghlasála.

“A leithéid de mhothú, ag imirt os comhair an lucht leanúna den chéan uair,” a dúirt sé i mBéarla i dteachtaireacht ar na meáin shóisialta, sular iompaigh sé ar an nGaeilge, “is breá liom an tír seo”.

Imríonn Omobamidele, arb as Léim an Bhradáin i gCill Dara dó, do Norwich City. Fuair sé moladh mór as na taispeántais a thug sé ag deireadh an tséasúir seo caite nuair a bhain an fhoireann ardú céime amach go dtí Príomhroinn Shasana, agus meastar nach fada go n-imreoidh sé a chéad chluiche sa Phríomhroinn.

Bhí an t-ógánach ar dhuine de na himreoirí is fearr ag Éirinn sa chluiche in aghaidh na Seirbia agus an fhoireann i mbun cosanta d’fhormhór na himeartha. Roghnaíodh an cúl báire Gavin Bazunu, atá ar chomhaois le Omobamidele, mar laoch na himeartha agus na Seirbiaigh curtha ó dhoras aige arís agus arís eile. D’éirigh le hÉirinn an comhscór a fháil a bhuí le cúl tuathail ó Nikola Milenkovic tar éis 85 nóiméad.

D’fhág comhscór an chluiche sin Éire sa cheathrú háit i nGrúpa A. Níor éirigh le foireann na hÉireann aon cheann dá gcúig chluiche go dtí sin sa chomórtas a bhuachan.

Chinntigh an comhscór sin in aghaidh na Seirbia nach mbainfeadh Éire áit amach ag Corn an Domhain an bhliain seo chugainn, ach beidh a bhfuil i ndán don bhainisteoir Stephen Kenny ag brath go mór ar chaighdeán na himeartha uathu sna cluichí atá fágtha acu, cluichí a imreofar i mí Dheireadh Fómhair agus mí na Samhna.