Tá sos comhraic fógartha ag treallchogaígh Choirdíneacha de chuid an PKK (Páirtí Oibrithe na Cordastáine) ó d’iarr a gceannaire Abdullah Öcalan ar an ngluaiseacht a n-airm a chur síos agus deireadh a chur lena bhfeachtas míleata i gcoinne stát na Tuirce. Bhí feachtas míleata ar siúl ag an PKK ó 1984 i leith ar mhaithe le críoch neamhspleách Choirdíneach a bhaint amach in oirdheisceart na Tuirce, cogadh ina bhfuair thart ar dhaichead míle bás.
Is iad na Coirdínigh an náisiún is mó ar domhan nach bhfuil a stát flaitheasach féin acu. Tá breis is 30 milliún acu ina gcónaí i gcríoch chomhtheagmhálach atá roinnte idir ceithre stát, ceantair in oirdheisceart na Tuirce, oirthuaisceart na Siria, tuaisceart an hIaráice agus iarthar na hIaráine ina bhfuil móramh Coirdíneach iontu. Críoch thar a bheith sléibhtiúil gan teagmháil leis an bhfarraige is ea an Chordastáin, ach réigiún fior-straitéiseach in iarthar na hÁise mar sin féin.