Tá achomharc ar chás cúirte caillte ag an rialtas maidir le comh-mhargadh rúnda más ann dó. Chuir an Chúirt Achomhairce iallach ar an rialtas an comh-mhargadh idir an stát agus Aerfhórsa Ríoga na Breataine (RAF) a nochtadh, ag dearbhú rialú a rinne an Ardchúirt i mí Iúil na mbliana 2014. Go dtí seo, níl sé dearbhaithe nó séanta ag an rialtas go hoifigiúil go bhfuil a leithéid de chomh-mhargadh ann agus is é an seasamh atá ag an rialtas ná gur bhain an cheist seo le cúinsí slándála náisiúnta.
Is é an comh-mhargadh atá ann, más ea, ná go dtugann stát na 26 chontae cead don Aerfhórsa Ríoga teacht isteach go haerspás na hÉireann i gcás ionsaí sceimhlitheoireachta nó idirnáisiúnta. Níl sé sonraithe cad go díreach a chiallaíonn ceachtar de na hionsaithe seo. Ceaptar go ndearnadh an comh-mhargadh seo go luath i ndiaidh ionsaí 9/11, nuair a rinne antoiscigh Ioslamacha faoi cheannas Osama bin Laden ionsaí eitleáin ar láithreacha éagsúla sna Stáit Aontaithe sa bhliain 2001.