Ní féidir aon amhras bheith ann ach go bhfuil bunaíocht stát na 26 chontae tiomanta chun fáil réidh le neodracht an stáit, atá ann ó thréimhse an Dara Cogadh Domhanda. Ní admhaíonn an bhunaíocht chéanna seo a mianta go hoscailte ach tuigeann Tadhg an Mhargaidh a bhfuil beartaithe acu agus léiríonn na meáin agus na hurlabhraithe oifigiúla go bhfuil gá le “hathmhachnamh” a dhéanamh ar an neodracht. Séanann rialtas an stáit seo go bhfuil aon bhagairt ann don neodracht, ach tá fianaise láidir ann a léiríonn go bhfuil cur chuige fadtéarmach agus leanúnach ann chun fáil réidh leis an bpolasaí seanbhunaithe seo.
Cuireadh ar bun an glas triarach in 2009, nuair a rith an rialtas athvóta ar reifreann Liospóin an Aontais Eorpaigh. Cailleadh an chéad reifreann an bhliain roimhe ar cúpla cúis. Ceann mór acu ba ea an bhuairt fhorleathan go scoirfear den neodracht leis an gconradh seo.