Tá folúntas tábhachtach fógartha ag Raidió Fáilte agus iad ag lorg príomh-irischraoltóir nuachta agus cúrsaí reatha don stáisiún. Labhair An Páipéar le Cillian Breatnach, bainisteoir an stáisiúin, faoin ról nua seo agus faoin bhfís atá aige do thodhchaí na hiriseoireachta Gaeilge i mBéal Feirste.
“Tá an post seo thar a bheith lárnach dúinn,” a mhíníonn sé. “Is é croílár an stáisiúin an nuacht agus na cúrsaí reatha, agus táimid ag iarraidh duine a cheapadh a mbeidh fís, fuinneamh agus scileanna cumarsáide aige nó aici chun an méid sin a threorú.”
Is post dúshlánach é, ach tá deis iontach ann freisin, dar le Breatnach. “Tá seans ag an té a ghlacfaidh leis an ról seo a bheith i gceannas ar chlúdach nuachta i gcroílár phobal na Gaeilge i mBéal Feirste. Beidh siad ag plé le scéalta a bhaineann le háitiúlacht, leis an pholaitíocht, leis an chultúr agus leis an tsaol laethúil, rud a choinníonn ár lucht éisteachta dílis dúinn.”
Thug an bainisteoir moladh ar leith don té a bhí sa phost roimhe seo, Jack Mac Íomhair. “Rinne Jack obair iontach mar phríomh-irischraoltóir nuachta agus cúrsaí reatha. Thug sé ardchaighdeán gairmiúlachta agus dúthracht leis, agus chuir sé a rian féin ar an stáisiún. Tá buíochas mór againn dó as a chuid seirbhísí.”
Dar le Breatnach, tá forbairt shuntasach déanta ag Raidió Fáilte le blianta beaga anuas agus tá deis ann anois tógáil ar an dúshraith sin. “Tá áiseanna nua-aimseartha againn, stiúideonna atá ar chaighdeán idirnáisiúnta, agus foireann atá lán díograise. Ciallaíonn sé seo gur féidir leis an té a bheidh sa phost nua obair a dhéanamh i dtimpeallacht atá spreagúil agus tacúil.”
Thug sé le fios gur stáisiún pobail é Raidió Fáilte atá oscailte do dhaoine ó gach aoisghrúpa agus ó gach cúlra. “Is stáisiún muid a chuireann fáilte roimh chách. Táimid ag iarraidh ardán a thabhairt don phobal agus d’fhoghlaimeoirí chomh maith le cainteoirí dúchais. Mar sin, beidh ról ag an phríomh-irischraoltóir nua i múnlú guthanna éagsúla agus i gcur i láthair scéalta a léiríonn éagsúlacht na Gaeltachta uirbí.”
Tá sé ag súil go mbeidh spéis ag iriseoirí óga agus agus daoine a bhfuil taithí acu chomh maith sa ról seo. “Is deis é do dhuine a bhfuil paisean aige don Ghaeilge agus don iriseoireacht. Tá an Ghaeilge beo bríomhar i mBéal Feirste, agus is féidir le Raidió Fáilte guth a thabhairt do na scéalta sin. Beidh sé seo ina chéim mhór don té a ghlacfaidh leis an fhreagracht.”
Dúirt sé go soiléir freisin go bhfuil tacaíocht iomlán ón stáisiún ann. “Ní bheidh an té a thiocfaidh isteach fágtha leo féin. Tá foireann thacúil ann, tá oiliúint agus tacaíocht leanúnach againn, agus beidh gach deis ann forbairt ghairmiúil a dhéanamh. Creidim go fírinneach gurb é seo ceann de na poist is spéisiúla i réimse na meán Gaeilge faoi láthair.”
Tá súil ag Breatnach go mbeidh iarratasóirí cróga sásta an deis a thapú. “Tá muid ag lorg duine a thabharfaidh a ghuth féin don nuacht agus a chuideoidh linn leanúint ar aghaidh ag cur seirbhís nuachta agus cúrsaí reatha ar ardchaighdeán ar fáil don phobal.”